बुटवल – के तपाईलाई कसैले चिट्ठा (लटरी) पर्यो भन्दै सामाजिक सञ्चालमा म्यासेज गरेका छन् ? इमोमा फोन त आएको छैन ?

लाखौंलाख चिट्ठा पर्यो भन्दै रकम लिनुअघि कर तिर्नुपर्छ भन्दै रकम माग गरेका छन् कि ? त्यसो हो भने ख्याल गर्नुस् है ? तपाई ठगिन सक्नुहुन्छ ।

पछिल्लो समय देशभर यस्तै ठगी धन्दा भइरहेका छन् । रुपन्देहीमा पनि यस्तै चिट्ठा परेको भन्दै ठगी गर्ने धन्दामा लागेका ३ जनालाई इलाका प्रहरी कार्यालय बुटवलले पक्राउ गरेको छ ।

सामाजिक सञ्जाल इमोमार्फत् लटरी रकम परेको प्रलोभन देखाएर ठगी गर्ने ३ जनालाई प्रहरीले पक्राउ गरी सार्वजनिक गरेको छ । सरकारलाई लटरी बापतको कर तिर्नुपर्ने भन्दै भारतीय रुपैयाँ ४५ हजार रुपैयाँ आईएमईमार्फत ठगी गर्ने सिद्धार्थ नगरपालिका–१ का २१ वर्षीय अव्दुल हफिज पठान, रोहणी गाउँपालिका–१ का २० वर्षीय सम्सुदिन जोलाहा र भारत महाराजगञ्ज जिल्ला घर भई सुनौली बस्ने १८ वर्षीय मुन्ना भन्ने मोहम्मद हसनलाई पक्राउ गरिएको जिल्ला प्रहरी कार्यालय रुपन्देहीका प्रहरी प्रमुख हृदय थापाले बताए ।

ती युवाले बुटवलका एक व्यक्तिलाई चिट्ठा परेको भन्दै ठग्न लागेका थिए । भारतीय रुपैयाँ २५ लाख लटरी परेको र त्यसबापत सरकारलाई कर तिर्न भारतीय ४५ हजार रुपैयाँ माग गर्दैगर्दा उनीहरूलाई बेलहियाबाट प्रहरीले पक्राउ गरेको हो ।

आईएमईमा रकम निकाल्ने बेलामा प्रहरीको टोलीले पक्राउ गरेको प्रहरीले जनाएको छ । उनीहरूको साथबाट २ लाख ४१ हजार ५ सय नगद पनि बरामद भएको छ । उनीहरूले आईएमईबाट रकम निकाल्दा नक्कली नागरिकता समेत प्रयोग गरिएको भेटिएको छ । नागरिकताबारे पनि थप अनुसन्धान भइरहेको प्रहरी प्रमुख थापाले बताए । उनीहरूले नक्कली नागरिकता प्रयोग गरी आईएमईबाट रकम झिक्दै गएका थिए । 

यस्तै, प्रहरीले जबर्जस्तीकरणी गरेको आरोपमा २ जनालाई पक्राउ गरेको छ । देवदह नगरपालिका–५ नमूना टोलमा २९ वर्षीया महिलालाई जबर्जस्तीकरणी गरेको भन्दै प्रहरीले देवदह नगरपालिका–५ का ५३ वर्षीय रामबहादुर विकलाई पक्राउ गरेको हो ।

बुटवल उपमहानगरपालिका–६ सुन्दरटोलमा २७ वर्षीया महिलालाई जबर्जस्तीकरणी गरेको भन्दै बुटवल उपमहानगरपालिका–६ का २५ वर्षीय कमलबहादुर सिंजालीलाई प्रहरीले पक्राउ गरेको छ ।

प्रहरीले लागूऔषधसहित ३ जनालाई समेत पक्राउ गरेको छ । देवदह नगरपालिका–७ का ३० वर्षीय सुनिल गुरुङ, २७ वर्षीय केशवसिंह तामाङ र सिद्धार्थनगर नगरपालिका–१३ बस्ने सहिदा खानलाई पक्राउ गरेको प्रहरीले बताएको छ । 

उनीहरूको साथबाट प्रहरीले ४ सय ४० ग्राम ब्राउन सुगुर, २–२ एमएलको डाईजेपाम २१ केप्सुल, नुफिन २१ वटा, फेनारगन २१ केप्सुल बरामद गरेको ईलाका प्रहरी कार्यालय बुटवलका प्रमुख डिलबहादुर मल्लले जानकारी दिए ।
मोटरसाइकल चोरी गर्ने बुटवल–१० का ३० वर्षीय प्रकाश फुल्लेललाई समेत पक्राउ गरेको छ ।