बुटवल – बिहीवारदेखि बुटवलमा लुम्बिनी एक्स्पो तथा अन्तर्राष्ट्रिय व्यापार मेला शुरू हुँदैछ ।

‘स्वरोजगार आत्मनिर्भरता हाम्रो आधार, शहरदेखि गाउँसम्म व्यापार विस्तार’ भन्ने नारा साथ रूपन्देही व्यापार संघले मेला आयोजना गरेको हो । 

मेला आयोजक मूल समितिले मंगलवार मेला स्थल बुटवल मण्डपमा  पत्रकार सम्मेलन गरी एक्स्पोको सम्पूर्ण तयारी पूरा भएको जानकारी गराएको छ । एक्स्पोको ५ नम्बर प्रदेशका मुख्यमन्त्री शंकर पोखरेलले बिहीवार बिहान ११ बजे उद्घाटन गर्ने कार्यक्रम छ । 

मेला आयोजक मूल समितिका संयोजक पदमप्रसाद श्रेष्ठले लुम्बिनी एक्स्पोमा कृषि र पर्यटनलाई विशेष जोड दिएको जानकारी दिए । ‘हाम्रो प्रदेशको समृद्धिको आधार कृषि र पर्यटन नै हो,’ संयोजक श्रेष्ठले भने, ‘त्यसैले एक्स्पोमा कृषिका विभिन्न उत्पादन, उत्पादका लागि आवश्यक पर्ने विभिन्न तरिकादेखि प्रदेशको पर्यटनको सम्भावनाहरूको खोजी पर्यटन, कृषि व्यवसायिक सचेतना गोष्ठी समेत राखेका छौं ।’ मेलामा स्थानीयदेखि विभिन्न ६ राष्ट्रका ५ सयभन्दा बढी स्टलहरू रहनेछन् । 

मेलामा १० लाख दर्शक र ४० करोडको कारोवार हुने लक्ष्य लिइएको संयोजक श्रेष्ठले जानकारी दिए । मेलामा विभिन्न सांस्कृतिक कार्यक्रम राष्ट्रिय स्तरको खुला भलिबल प्रतियोगिता, पर्यटन, कृषि व्यावसायिक सचेतना गोष्ठी, फोटो प्रदर्शनी र चित्रकला प्रतियोगिता समेत राखिएको मेलाका सहसंयोजक यामलाल लोहनीले जानकारी दिए ।

मेला स्थलमा पुर्खाले यसै क्षेत्रमा तत्कालीन बेलायती सामराज्यबादी सैनिकलाई परास्त गरी बिजय हाँसिल गरेको जितगढी किल्लाको झलक सहित पार्क निर्माण समेत गरिएको छ । एक्स्पोमा होटलका ४०, गार्मेन्टका १ सय, कृषिका ७०, जुत्ता÷चप्पल ४०, अन्तर्राष्ट्रिय ३०, दैनिक उपभोग्य १ सय २०, अटो पेभेलियन २०, स्वदेशी ६०, आइटी ६०, सेवामूलक ६० र केही निःशुल्क स्टलहरू समेत रहेको संघका महासचिव प्रकाश ढकालले जानकारी दिए । 

एक्स्पोको पूर्वसन्ध्यामा बुधवार बिहान ११ बजे विभिन्न जात धर्म, समुदायको लोक संस्कृति झल्किने खालका झाँकी जनचेतनामूलक र्‍याली प्रदर्शन गर्दै छ । र्‍यालीले बुटवल बजार परिक्रमा गरी मेलास्थलमा पुगेर समापन हुनेछ ।