काठमाडौं–सातै प्रदेशका सभामुख र उपसभामुखको हालै चितवनको सौराहामा सम्पन्न भेलाले विभिन्न ७ बुँदे निर्णय गरेको छ । 

संविधानको कार्यान्वयन र प्रदेशसभाको काम कारबाही सहज, सुव्यवस्थित तथा प्रभावकारी गराउने उद्देश्यका साथ भएको भेलाले सो ७ बुँदे निश्कर्ष निकालेको हो ।

निर्णयअनुसार अन्तरप्रदेश तथा अनुभव आदानप्रदान तथा अन्तरक्रिया कार्यक्रमलाई निरन्तरता दिने, अन्तर् प्रदेशसभा समन्वय परिषद् गठनका लागि पहल गर्ने, प्रदेश सभाका पदाधिकारी तथा सदस्यहरुको मर्यादाक्रमलाई परिमार्जन गर्न पहल गर्ने, प्रदेशसभा हल तथा पूर्वाधार निर्माण गर्न पहल गर्ने, प्रदेशका लागि आवश्यक कानून निर्माण गर्न केन्द्र सरकारलाई आग्रह गर्नेलगायत छन् । 
यसैबीच सोसम्बन्धी निर्णय मंगलबार प्रधानमन्त्री केपी शर्मा ओलीलाई बुझाइएको छ । 

सो क्रममा प्रधानमन्त्री ओलीले नयाँ मर्यादाक्रम लगायत सभामुख तथा उपसभमामुखले उठाएको विषयलाई आफूले सकारात्मक रुपमा लिएको भन्दै त्यसका लागि प्रक्रिया अघि बढाउने आवश्वासन दिएको बताइएको छ ।