काठमाडौँ–नेपालमा अहिले स्थिर सरकार भएकाले अमेरिकी उच्चस्तरीय भ्रमण हुनसक्ने सम्भावना रहेको बताइएको छ । 
त्यस्तै, यो भ्रमणलाई नेपाली उत्पादन अमेरिकामा निर्यातका लागि सहज वातावरण बनाउने तथा अमेरिकालाई नेपालको कम्युनिष्ट सरकारप्रति विश्वासमा लिने कुरामा केन्द्रित गर्नुपर्ने कूटनीतिज्ञ तथा पराष्ट्रविदहरूले बताएका छन् । 

विगत १७ वर्षपछि नेपालका परराष्ट्रमन्त्री प्रदीपकुमार ज्ञवाली अहिले अमेरिका भ्रमणमा रहेको र यो भ्रमण आफैंमा महत्वपूर्ण रहेको पनि उनीहरूको धारणा छ । 
भ्रमणबारे कुरा गर्दै पूर्व परराष्ट्रमन्त्री महेन्द्रबहादुर पाण्डेले यो भ्रमणले दुई देशबीचको सम्बन्धमा सकारात्मक प्रभाव पार्ने बताउँदै भ्रमण हुनु मात्र महत्वपूर्ण विषय नभई भ्रमणमा के कुरा उठे त्यो महत्वपूर्ण हुने बताए । 

उनले कपडा, पश्मिना तथा घरेलु हस्तकलाका समानलाई अमेरिकामा भन्सार सहुलियत दिए पनि अनेकौं प्राविधिक झन्झट कायम रहेकाले त्यसलाई हटाउन पहल गर्नुका साथै आर्थिक रुपमा फलदायी हुने गरी सम्बन्ध विस्तार गर्नुपर्ने बताए । आज प्रकाशित गोरखापत्र दैनिकमा विस्तृतमा खबर छापिएको छ ।