धनगढी – सुदूरपश्चिम प्रदेश सरकारले सञ्चालनमा ल्याएको हेलो सीएममा जनगुनासो आउनै छोडेको छ ।

सर्वसाधारणको जनगुनासो सुन्न र समाधान गर्न प्रदेश सरकारले जेठ ७ गतेदेखि विधिवत् रुपमा पैसा नलाग्ने १६६०–९१५२७२३ टोल फ्री नम्बर सहितको हेलो सीएम सेवाको शुरूवात गरेको थियो । तर आजभोलि जनजुनासो आउनै छोडेको हो ।

मुख्यमन्त्री त्रिलोचन भट्टले सेवाको उद्घाटन गर्दै तत्काल समाधान गर्ने विषयको गुनासो तथा समस्यालाई ४ घण्टाभित्रै समाधान गरिने वाचा गरेका थिए । सेवालाई उनले सरकार र जनताबीचको पुलको रुपमा अथ्र्याएका थिए । तर १ वर्ष बित्न नपाउँदै पुल प्रतिको आकर्षण अवरुद्ध हुनै लागेको त होइन भन्ने सवाल पैदा गरेको हो ।

मुख्यमन्त्री तथा परिषद् कार्यालयको तथ्यांक अनुसार जेठ महिनामा ८८ वटा जनगुनासो आएको थियो । असारमा ३१, साउनमा १७, भदौमा ५, असोजमा १७, कात्तिकमा ३, मंसिरमा २ र पुसमा अझैसम्म कुनै किसिमको जनगुनासो नआएको पाइएको छ । हालसम्म विभिन्न प्रकृतिका गरी १ सय ६३ वटा उजुरी हेलो सीएमबाट परेको देखिएको छ ।

तथ्यांकलाई हेर्दा सेवाको शुरूवाती दिनमा जनगुनासो बढी आएको देखिन्छ । तर क्रमिक रुपमा घट्दो क्रममा रहेको छ । जनताको जनगुनासो आउनै छोडेपछि या त सरकारको गुनासो समाधानको पाटो नै फितलो भएको हुनुपर्छ या गुनासो नै समाधान नहुने भएपछि किन गुनासो राख्ने भन्ने मानसिकता जनतामा पलाएको हुनसक्ने बताउँछन् राष्ट्रिय मानवअधिकार आयोगका प्रदेश निर्देशक दिपकध्वजजंग कार्की ।

केही महिना अघिसम्म सुदूरपश्चिम प्रदेशका निर्देशक समेत रहेका कार्कीले हेलो सीएमको प्रभावकारिता सरकारको कार्यशैलीसँग जोडिएकाले सरकारले सजग भएर अगाडि बढ्नुपर्नमा औल्याए । अझै पनि शक्ति बाँडफाँडको सवालमा कानून नबनेको अवस्थामा सरकारले नागरिक समाज र मिडियासँग पनि सहकार्य गरेर जनगुनासोलाई समाधान गर्नुपर्ने निर्देशक कार्कीको सुझाव छ ।

तर मुख्यमन्त्री तथा परिषद्को कार्यालयका सूचना अधिकारी मानसिंह बिष्टको भनाई भने फरक छ । उनी जनगुनासो घट्नुको कारण जुन महिनामा बढी विकासे गतिविधि हुन्छन्, त्यतिबेला गुनासो पनि आउने बताउँछन् । जनतामा कुन प्रकृतिको गुनासो कुन निकायबाट सम्बोधन हुन्छ भन्ने बारेको चेतले गर्दा पनि गुनासोमा कमी आएको हुन सक्ने अधिकृत बिष्टको भनाई छ । तथापि आफूहरू आएका गुनासोको समाधान खोज्दै आएको उनले बताए ।

मुख्यमन्त्री कार्यालयले सामान्य प्रकृतिका गुनोसोलाई ३ दिनदेखि १ हप्ताभित्र समाधान गर्ने बताउँदै आएको छ ।

हेलो सीएमले दुर्घटना, विपद् सम्बन्धी घटना र उद्दारलाई पहिलो प्राथमिकतामा राखेको छ भने प्रदेशस्थित सार्वजनिक निकायबाट वितरण गरिने सेवा सुविधामा भेदभाव, सार्वजनिक निकायबाट प्रदान गरिने सेवासुविधा प्राप्तिमा भएको अवरोध, सार्वजनिक निकायको गैरकानूनी क्रियाकलाप वा त्यस्तो कार्यबाट कुनै व्यक्तिलाई हानी नोक्सानी पुगेको अवस्थामा हेलो सीएममा गुनासो राख्न सकिने छ । 

संविधान र प्रचलित कानूनप्रदत्त हक अधिकारको उपयोगमा बाधा, अवरोध वा विभेद गरिएमा र भष्टाचार तथा महिला हिंसा वा अन्य लैंगिक हिंसा सम्बन्धी क्रियाकलाप भएमा गुनासो गर्न सकिने जनाइएको छ ।