काठमाडौं- चलचित्र ‘गोपी’ यूनिटले कविता प्रतियोगीता आह्वान गरेको छ ।

आरोही इन्टरटेन्मेण्ट प्रालिले चलचित्रको प्रवद्र्धन गर्ने उद्धेश्यका साथ नगद पुरस्कारसहितको कविता प्रतियोगिता आह्वान गरेको हो । प्रतियोगितामा प्रथम, द्वितिय र तृतिय हुनेलाई क्रमशः ३० हजार, २० हजार र १० हजार रुपैयाँ पुरस्कार दिइनेछ । त्यस्तै सात जनालाई जनही ५ हजार रुपैयाँको सान्त्वना पुरस्कार पनि प्रदान गरिनेछ ।

प्रतियोगितामा विश्वका जुनसुकै स्थानमा बस्ने नेपालीहरुले भाग लिन पाउनेछन् । सहभागीले चलचित्र ‘गोपी’को ट्रेलर हेरेर स्वावलम्बन, स्वरोजगार र परिश्रमको भाव झल्किने कविता लेख्नुपर्नेछ ।

सहभागीहरुबाट प्राप्त कवितालाई दुई कवि उपेन्द्र सुब्बा र नवराज पराजुलीले मूल्यांकन गरेर विजेता छनोट गर्नेछन् । आगामी माघ ७ गतेसम्म प्राप्त कवितालाई प्रतियोगितामा समावेश गरिने आयोजकले जनाएको छ । माघको दोस्रो हप्ता विजेतालाई पुरस्कृत गरिनेछ ।

‘गोपी’ चलचित्रलाई साहित्यसँग जोड्नका लागि कविता प्रतियोगिता आयोजना गरिएको निर्देशक दीपेन्द्र लामाले बताए ।

आरोही इन्टरटेनमेन्टले निर्माण गरेको ‘गोपी’ आगामी माघ १८ गतेबाट प्रदर्शनमा आउँदैछ । सामिप्यराज तिमल्सेनाको पटकथा, शैलेन्द्र डि. कार्कीको छायांकन र निमेष श्रेष्ठको सम्पादन रहेको चलचित्रमा आरोही केसी निर्माता र श्रीधर पौडेल कार्यकारी निर्माता रहेका छन् । चलचित्रमा विपिन कार्की, वर्षा राउत, सुरक्षा पन्त, रमेश अधिकारी, अंकित खड्का, प्रकाश घिमिरे, भोलाराज सापकोटा, सरोज अर्याल लगायतले अभिनय गरेका छन् । कविता प्रतियोगितामा सहभागी हुनेहरुका लागि विभिन्न शर्तहरु राखिएका छन् ।