काठमाडौं–२०७२ साल बैशाख १२ गतेको विनाशकारी भूकम्पले भत्किएको धरहरा पुनर्निर्माणको काम विहीबारबाट औपचारिक रुपमा शुरु भएको छ । प्रधानमन्त्री केपी शर्मा ओलीले विहान ११ बजे धरहरा पुनर्निर्माणको शिलान्यास  गरेका हुन् । 

भूकम्पले भत्किएको ४ वर्ष पुग्नै लाग्दा धरहरा पुनर्निर्माणको शिलान्यास भएको हो । 

भूकम्पले भत्किएको धरहरालाई ‘भुइँचालो स्मारक’ बनाइने

विहीबार प्रधानमन्त्रीले शिलान्यास गरेपनि धरहरा निर्माणको काम भने केही साता अघि नै शुरु भएको छ । 

निर्माणको ठेक्का पाएको जिआइइटिसी–रमन जेभीले धरहरा निर्माणस्थलका अनावश्यक सामग्री हटाउँदै काम शुरु गरिसकेको छ । पुरानो धरहरा र नयाँ बन्ने धरहरा क्षेत्रलाई तारबार गरी निर्माण सामग्री भण्डारण गरिएको छ । 

नयाँ धरहरा पुरानोबाट १० मिटर पूर्वतर्फ पहिलेकै जस्तो ढाँचामा निर्माण गरिनेछ । गजुरसहित नयाँ धरहराको उँचाई करिब ७७ मिटरको हुनेछ । पुनर्निर्माण हुने धरहराको स्वरुप क्षतिग्रस्त धरहराको जस्तै हुन्छ । मोटाइ भने पहिलेको भन्दा केही बढी हुनेछ । 

भूकम्पबाट बचेको भागलाई ‘भुइँचालो स्मारक’ का रूपमा सिसाको फ्रेम (टेम्पर्ड ग्लास) ले छोपेर राखिने पुनर्निर्माण प्राधिकरणले जनाएको छ । नयाँ धरहरा हेर्न आउनेले पुरानो धरहराको खण्डहर पनि हेर्न पाउन भन्ने उद्देश्यले उक्त खण्डहरलाई जोगाउन लागिएको हो ।  

अब धरहरा क्षेत्र अब ४२ रोपनी जमिनमा फैलनेछ । त्यसका लागि नजिकै रहेको गोश्वारा हुलाक कार्यालय हटाइने छ भने वाणिज्य बैङ्क रहेको टक्सार भवन पनि भत्काइने छ । सो ठाउँमा सङ्ग्रहालय बनाउने योजना प्राधिकरणको छ । धरहराका क्षेत्रमा मनोरम बगैँचा समेत निर्माण गरिने छ । नयाँ बन्ने धरहरामा जमिनमुनि दुई र जमिनमाथि २२ तला गरी जम्मा २४ तलाको हुनेछ । तर बाहिरबाट हेर्दा ११ तलाजस्तो मात्र देखिनेछ । 

धरहरा निर्माणसँगै यसको छेउमा अत्याधुनिक ३ तले सवारी पार्किङ स्थल पनि बन्ने छ । हाल कायम रहेको गोश्वारा हुलाक कार्यालय भएको स्थानमा पार्किङ स्थल बनाउन लागिएको हो । अहिले भएको गोश्वारा हुलाक कार्यालयमा प्रवेशद्वार हुनेछ । प्रवेश गरेपछि त्यहाँबाट दुई तलामुनि गएर लिफ्टबाट माथिल्लो भागमा जान सकिनेछ ।

पुनर्निर्माणका क्रममा सुन्धाराको धारालाई पनि मर्मत गरिनेछ । 

धरहरा निर्माणका लागि अघिल्लोपटक प्रधानमन्त्री भएकाबेला केपी शर्मा ओलीले २०७२ सालमा नेपालीको लगानीबाटै धरहरा बनाउन ‘मेरो धरहरा म बनाउँछु’ अभियान शुरु गरेका थिए । त्यसका लागि छुट्टै बैङ्क खातासमेत सञ्चालनमा ल्याइएको थियो । जसमा प्रधानमन्त्री ओली र तत्कालीन मन्त्रीहरुले एक महिनाको तलब योगदान गरेका थिए ।