काठमाडौं – सरकारले प्रदेश नम्बर २ मा स्वास्थ्य विज्ञान प्रतिष्ठान खोल्ने निर्णय गरेको छ ।

सोमवार बसेको मन्त्रिपरिषद् बैठकले उपप्रधान एवं स्वास्थ्य तथा जनसंख्या मन्त्री उपेन्द्र यादवको प्रस्तावलाई स्वीकृति दिँदै सप्तरीको राजविराजमा रामराजाप्रसाद सिंह स्वास्थ्य विज्ञान प्रतिष्ठान स्थापना गर्ने निर्णय गरेको हो ।

सरकारको यो निर्णयसँगै प्रदेश २ र १ का चिकित्साशास्त्र अध्ययन गर्ने विद्यार्थीहरू लाभान्वित हुनेछन् । दुवै प्रदेशका बासिन्दाले सहज स्वास्थ्य सेवाको सुविधा पाउने स्वास्थ्य मन्त्रालयको विश्वास छ ।

स्वास्थ्यमन्त्री यादव संसद्‍मा सोही जिल्लाबाट प्रतिनिधित्व गर्छन् । २०७४ सालको प्रतिनिधिसभा निर्वाचनमा यादव सप्तरी क्षेत्र नम्बर २ बाट निर्वाचित भएका हुन् ।

सरकारले यो निर्णय औपचारिक रूपमा सार्वजनिक गर्न भने बाँकी छ । केही समययता मन्त्रिपरिषद्का निर्णयहरू बिहीवार पत्रकार सम्मेलन गरी सार्वजनिक गर्ने गरिएको छ ।