दोस्री छोरी जन्माउने आमालाई २५ हजार भत्ता दिँदै महानगर

पुस २३, २०७५

विराटनगर – विराटनगर महानगरपालिकाको सभाहलमा विराटनगर–१९ की संगीता भगत आफ्नी कान्छी छोरीसहित भेटिइन् ।

दोस्रो सन्तानको रुपमा विराटनगर महानगरपालिकाले २५ हजार दिने भनेपछि उनी छोरीसहित कार्यालयमा पुगेकी हुन् ।


ADVERTISEMENT

छोरीसहित कार्यालयमा पुगेकी थिइन् विराटनगर–५ त्रिमुर्तीचोककी सरस्वती रम्तेल नेपाली । उनी पहिलो सन्तान छोरी लिएर कार्यालयमा पुगेकी थिइन् । पहिलो सन्तान छोरी जन्माउनेलाई महानगरले ३ हजार रुपैयाँ भत्ता दिने गरेको छ ।

सरस्वती र संगीता मात्र होइन, विराटनगर महानगरपालिकामा  पहिलो सन्तान र दोस्रो सन्तान छोरी जन्माउने आमाहरू कार्यालयमा पुगेका हुन् । यसरी पुग्नेमा दोस्रो सन्तान छोरी जन्माउने ४ जना थिए भने २२ जना पहिलो सन्तान छोरी जन्माउने आमा थिए ।

विराटनगर महानगरपालिकाले पहिलो नगर सभाबाट पहिलो सन्तान छोरी जन्माउने आमालाई छोरीको पोषणको लागि भन्दै ३ हजार रुपैयाँ दिँदै आएको हो । पहिलो सन्तान मात्र छोरी जन्माउँदा दोस्रो सन्तान छोरीको भ्रूण हत्या हुन थालेको पाइएपछि छोरी बचाउने अभियान अन्तर्गत दोस्रो सन्तान पनि छोरी जन्माउनेलाई २५ हजार रुपैयाँ दिने निर्णय चालू आर्थिक वर्षको नीति तथा कार्यक्रमबाट शुरू भएको  उपमेयर इन्दिरा कार्कीले बताइन् ।

‘३ महिना गर्भमा राखेपछि छोरी हुँदा भ्रूण हत्या गर्ने र छोरा हुँदा राख्ने क्रम बढ्यो । त्यसलाई रोक्न यो कार्यक्रम ल्याइएको हो,’ उपमेयर कार्कीले भनिन्, ‘भ्रूण हत्याले आमाको स्वास्थ्यलाई पनि गम्भीर असर पारेको छ ।’

मेयर भीम पराजुलीले पहिलो वर्ष ३ हजार रुपैयाँ दिएर कार्यक्रम शुरू गरिएकोमा दोस्रो वर्षदेखि दोस्रो सन्तान छोरी जन्माउने आमालाई २५ हजार रुपैयाँ छोरी बालिग नहुँदासम्म कसैले झिक्न नमिल्ने गरी बैंकमा जम्मा गरिएको बताए । कम्तिमा ४ पटक स्वास्थ्य परीक्षण गरिएको, २० वर्ष उमेर कटेका आमाबाट जन्मिएका नवजात शिशुलाई भविष्यमा शिक्षामा सहयोग पुगोस् भनेर कार्यक्रमलाई प्रभावकारी रुपमा अगाडि बढाइएको मेयर पराजुलीले बताए । 

कार्यक्रमले आमाको संरक्षक रहने गरी खाता सञ्चालन हुने र २५ हजार रुपैयाँ खातामा महानगरपालिकाले जम्मा गरिदिने गरी ग्लोबल आईएमई बैंकसँग सहकार्य भएको छ ।

महानगरपालिकाले शुरू गरेको अभियानमा अझै धेरै आमा रकम पाउनबाट छुटेको स्वयं महानगरपालिकाले जनाएको छ । प्रमुख प्रशासकिय अधिकृत कुमार दाहालले लक्षित समुदायमा कार्यक्रमबारे जनचेतनाको खाँचो रहेको बताए । उनले अभियानबारे अझै धेरै छुटेको हुनसक्ने लागेकाले अभियानलाई अझ प्रभावकारी बनाइने जानकारी दिए ।

पुस २३, २०७५ मा प्रकाशित

प्रतिक्रिया दिनुहोस

ताजा समाचार