काठमाडौं — उत्तर कोरियाका नेता किम जोङ–उन बुधवार अपराह्न बेइजिङबाट रेल चढेर उत्तर कोरिया फर्केका छन् । 

किमको तीनदिने अघोषित भ्रमण रहस्यकै पर्दामा लुकेको थियो । बेइजिङमा उनको उपस्थितिलाई पुष्टि गर्नुबाहेक उत्तर कोरिया र चीनले उनको भ्रमणका बारेमा केही पनि खुलाएनन् । 

किमले चिनियाँ राष्ट्रपति शी चिनफिङसँग मंगलवार एक घण्टा वार्ता गरेका थिए । उनीहरूले हिजो बेलुका आआफ्ना पत्नीका साथ बेइजिङस्थित ग्रेट हल अफ द पीपुलमा भोजन गरेका थिए । 

मंगलवारको बैठकले किमको अमेरिकी राष्ट्रपति डोनल्ड ट्रम्पसँगको भेटघाटलाई केन्द्रित गरेको थियो । 

नयाँ वर्षको अवसरमा सम्बोधन गर्दै किमले अमेरिकाका तर्फबाट प्रतिबन्ध कायम रहिरहेमा आणविक निःशस्त्रीकरणका विषयमा अर्कै बाटो हिँड्ने चेतावनी दिएका थिए । 

प्योङयाङको आणविक गतिविधिका कारण चीन र उत्तर कोरियाबीचको सम्बन्ध हालका वर्षमा बिग्रेको भए पनि किमले शीलाई अमेरिका र दक्षिण कोरियासँगको सबै सम्झौताका बारेमा अवश्यै खबर गर्ने गरेका छन् ।

एएफपीबाट