काठमाडौं — अमेरिकाका राष्ट्रपति डोनल्ड ट्रम्पले बुधवार विपक्षी डेमोक्रेटिक नेताहरूसँगको महत्त्वपूर्ण बैठक अचानक अन्त्य गरेका छन् । बैठकलाई उनले समयको बर्बादी भनी चित्रित गरे । 

अमेरिकामा आंशिक रूपमा सरकारी कामकाज ठप्प भएको बुधवार १९औं दिन पुगेको छ र यो अन्त्य हुने लक्षण पनि देखिएको छैन ।

बजेटका सम्बन्धमा सम्झौता थप बिग्रेपछि लगभग आठ लाख संघी कर्मचारीहरूलाई समस्या परेका् छ । मेक्सिकोसँगको दक्षिणी सीमामा पर्खाल ठड्याउने आफ्नो मागलाई दोहो¥याउँदै राष्ट्रपति ट्रम्पले गरेको पहिलो सम्बोधनको एक दिनपछि डेमोक्रेटहरूसँगको सम्बन्ध बिग्रिएको हो । 

‘चक र न्यान्सीसँगको एउटा बैठकबाट भर्खर निस्किएँ, पूरै समयको बर्बादी,’ ट्रम्पले ट्वीट गर्दै बताए । उनले सिनेट माइनोरिटी नेता चक शुमर र तल्लो सदनकी सभामुख न्यान्सी पेलोसीसँगको संवादका बारेमा यसो भनेका हुन् । 

‘मैले तत्कालै बाटो खोलें भने ३० दिनमा के हुन्छ ? तपाईंहरू पर्खाल वा स्टीलको छेकवारसहितको सीमा सुरक्षालाई समर्थन गर्नुहुन्छ त भनी सोधें । न्यान्सीले हुँदैन भनिन् । मैले बाईबाई भनें, अरू केही कुराले काम गर्दैन ।’

शुमरले बैठकका विषयमा ह्वाइट हाउस बाहिर भेला भएका पत्रकारलाई बताएअनुसार, राष्ट्रपति जुरुक्क उठे अनि बाहिर निस्के ।

‘उनले सभामुख पेलोसीलाई सोधे, तिमी मेरो पर्खाल प्रस्तावमा सहमति जनाउछ्यौ ? उनले जनाउदिनँ भनिन् अनि उनी जुरुक्क उठे अनि कुराकानी गर्न लायक केही पनि कुरा छैन भने र हिँडे,’ शुमरले बताए । ‘आफूले भनेको कुरा
नभएपछि उनले फेरि एकपटक नखरा देखाएको हेर्न पाइयो ।’

यो बैठकअघि ट्रम्पले क्यापिटल हिलमा सिनेटमा रहेका रिपब्लिकनहरूसँग दिवाभोज गरेका थिए र त्यसक्रममा उनले रिपब्लिकनहरूलाई सँगै बस्न आग्रह गरे । 

केही रिपब्लिकनहरूले कामकाज ठप्प हुने स्थितिका विषयमा चिन्ता व्यक्त गरेका छन् ।

द गार्डियनबाट