काठमाडौं — इजरायलका एक पूर्वमन्त्री गोनेन सेगेभलाई इरानका लागि जासूसी गरेको मामिलामा ११ वर्षको कारावास सजाय सुनाइने भएको छ । इजरायलको न्याय मन्त्रालयले यसको जानकारी दिएको छ । 

सेगेभ सन् १९९० मा इजरायलमा ऊर्जामन्त्री थिए । उनले आफैं इरानका लागि जासूसी गरेको कुरा कबुलेका छन् । 

उनीमाथि इजरायली अधिकारी र सेनासँग जोडिएको जानकारी लीक गरेको आरोप लागेको थियो । 

सेगेभ नाइजेरियामा थिए र उनलाई मध्य अफ्रिकी देश इक्वेटोरियल गिनीबाट पक्राउ गरिएको थियो । इजरायलले मे महिनामा सेगेभलाई सुपूर्दगीमार्फत झिकाएको थियो । 

सेगेभलाई फेब्रुअरी ११ मा औपचारिक रूपमा सजाय सुनाइनेछ । यस विषयमा इरानी अधिकारीहरूको बयान आइसकेको छैन । 

यसअघि पनि सन् २००५ मा सेगेभलाई कूटनीतिक राहदानी प्रयोग गरेर नेदरल्यान्ड्सबाट ३० हजार शंकास्पद औषधिको तस्करी गरेको आरोपमा पाँच वर्षको जेल सजाय दिइएको थियो । 

उक्त घटनापछि उनको चिकित्सा प्राक्टिस गर्ने लाइसेन्स पनि रद्द गरिएको थियो । तर सन् २००७ मा जेलबाट छुटेपछि उनलाई नाइजेरियामा प्राक्टिस गर्ने अनुमति प्राप्त भएको थियो । 

इजरायलको आन्तरिक सुरक्षा सेवा अधिकारी शिन बेटले अघिल्लो वर्षको जुन महिनामा भनेका थिए, ‘सेगेभले सन् २०१२ मा इरानी उच्चायोगसँग सम्पर्क गरे र दुईचोटि इरान पनि गए । उनले आफैं यो कुरा स्वीकार गरे ।’

सेगेभले ऊर्जा क्षेत्रसँग सम्बन्धित जानकारी, इजरायलमा सुरक्षा साइट, सुरक्षा संस्थानका अधिकारीसँग जोडिएका जानकारी इरानलाई दिएका थिए ।

बीबीसीबाट