सिरियाका कुर्दहरूको सुरक्षाका सम्बन्धमा टर्कीसँग सहमति गरिने अमेरिकाको भनाइ

पुस २९, २०७५

काठमाडौं — अमेरिकाका परराष्ट्रमन्त्री माइक पम्पिओले सिरियामा रहेका कुर्दिश लडाकूहरूलाई अमेरिकाको सैन्य फिर्तीपछि सुरक्षा दिने सम्बन्धमा टर्कीसँग एक सहमतिमा पुगिने विषयमा आशावादी रहेको बताएका छन् । 

उनले आफ्ना टर्किश समकक्षीसँगको फोनवार्तापछि युरनाइटेड अरब इमिरेट्समा यो कुरा बताएका हुन् । 

अमेरिकी बलहरूले कुर्दिश मिलिसियासँग मिलेर उत्तरी सिरियामा इस्लामिक स्टेट लडाकूविरुद्ध लडेका हुन् ।

तर टर्कीले पीपुल्स प्रोटेक्सन युनिट्स (वाईपीजी) लाई आतंकवादी समूह मानेको छ र त्यसलाई दमन गर्ने प्रतिज्ञा गरेको छ । 

पम्पिओ अहिले मध्यपूर्वको भ्रमण गरेर साझेदारहरूलाई सुनिश्चित गराउने प्रयास गरिरहेका छन् । राष्ट्रपति डोनल्ड ट्रम्पले अघिल्लो महिना अचानक सिरियाबाट अमेरिकी बलहरू फिर्ता हुने घोषणा गरेपछि चिन्तित साझेदारहरूलाई ढुक्क बनाउन उनी त्यहाँ पुगेका हुन् । 

संवाददाताहरूसँग अबु धाबीमा कुरा गर्दै पम्पिओले टर्कीका जनताको अधिकार अनि टर्कीका राष्ट्रपटि रेचेप तैयिप अर्दोआनले आफ्नो देशलाई आतंकवादीहरूबाट रक्षा गर्ने अधिकार राखेकोलाई अमेरिकाले स्वीकार गरेको बताए । 

‘यत्तिका समयसम्म हामीसँगै मिलेर लड्नेहरू पनि सुरक्षाका हकदार छन् भन्ने कुरा पनि हामीलाई थाहा छ,’ उनले भने । 

पम्पिओले टर्कीका परराष्ट्रमन्त्री मेव्लुत काभुसोग्लुसँग कुराकानी गरेको बताउँदै थपे, ‘धेरै कुराहरूमा थप छलफल बाँकी छ तर हामीले सकारात्मक परिणाम हासिल गर्नेमा म आशावादी छु ।’

गत साता राष्ट्रपति अर्दोआनले अमेरिकाका राष्ट्रिय सुरक्षा सल्लाहकार जोन बोल्टनले कुर्दिश लडाकूहरूलाई सुरक्षा दिइनुपर्ने भनी गरेको आह्वानलाई रिसाउँदै अस्वीकार गरेका थिए । 

यस्ता वक्तव्यहरू अस्वीकार्य हुने उनले बताएका थिए ।

बीबीसीबाट


ADVERTISEMENT

पुस २९, २०७५ मा प्रकाशित

प्रतिक्रिया दिनुहोस

ताजा समाचार