खेलकुद

महिला टी-ट्वान्टी क्रिकेटमा नेपालको लगातार दोस्रो जित, मलेसिया ६ विकेटले पारजित

लोकान्तर संवाददाता

पुस २९, २०७५

काठमाडौं— थाइल्याण्डमा जारी महिला टी—ट्वान्टी स्म्यास क्रिकेटमा नेपालले लगातार दोस्रो जित निकालेको छ । बैंककमा आइतबार भएको खेलमा नेपालले मलेसियालाई ६ विकेटले पराजित गर्दै दोस्रो जित निकालेको हो ।

जितसंगै समूह ‘ए’ मा रहेको नेपालको सेमिफाइनलमा पुग्ने सम्भावना बलियो बनेको छ । मलेसियाले दिएको ६२ रनको लक्ष्य नेपालले १६ ओभर २ बलमा मात्र ४ विकेटको क्षतिमा भेट्टायो । नेपालको जितमा रोमा थापाले अविजित २० रन र सिता राना मगरले १६ रन जोडे ।

यसअघि टस जितेर पहिले ब्याटिङ गरेको मलेसियाले १९ ओभर ३ बलमा सबै विकेट गुमाएर ६१ रन बनाएको थियो । मलेसियालाई सस्तैमा समेट्न नेपालकी सरिता राना मगर एक्लैले ४ विकेट लिइन् । यस्तै नेरी थापा, इन्दु बर्मा र कविता कुवरले एक एक विकेट लिए ।

पहिलो खेलमा नेपालले चीनलाई १० विकेटले हराएको थियो । पहिलो खेलमा चीनलाई हराएको नेपालले ४ अंक जोडेको छ । अब नेपालले सोमबार युएईसंग खेल्नेछ ।

पुस २९, २०७५ मा प्रकाशित