काडमाडौं - आन्तरिक विवादका कारण विवेकशील साझाबाट अलग भएर उज्ज्वल थापाको नेतृत्वमा गठन भएको ‘विवेकशील नेपाली दल’ कार्यालयविहीन भएको छ । 

पार्टीका एक संयोजक थापालगायत १६ केन्द्रीय सदस्यले नयाँ दल दर्ताका लागि शुक्रबार निर्वाचन आयोगमा निवेदन दिएका थिए ।  १७ महिना अघि रविन्द्र मिश्र नेतृत्वको साझा पार्टी र थापा नेतृत्वको विवेकशील दल एक भएर विवेकशील साझा नामको नयाँ पार्टी बनेको थियो । स्थानीय निकायको चुनाव सकिएलगत्तै प्रादेशिक र संघीय निर्वाचनमा एकीकृत भएर भाग लिएको विवेकशील साझाले प्रादेशिक चुनावमा राम्रै उपस्थिति जनाएको थियो । तर पाछिल्लो समयमा देखिएको विवादका कारणले गत शुक्रबार पुरानै नामको नयाँ दल दर्ताका लागि निर्वाचन आयोगमा थापा पक्षीय नेताहरूले निवेदन दिएका छन् ।

४२ प्रतिशत केन्द्रीय सदस्यलाई लिएर पुरानै नामबाट नयाँ पार्टी बनेको विवेकशील नेपाली दलको पार्टी कार्यालय कहाँ हुने भन्ने अहिलेसम्म टुंगो लागेको छैन । ‘आज मिटिङ  बोलाइएको छ, सम्भवतः आजको मिटिङले कार्यालय कहाँ राख्ने भन्ने टुंगो लाग्नेछ’ विवेकशीलका एक नेता मिलन पाण्डेले लोकान्तरलाई बताए ।

विवेकशीलको पुरानो पार्टी कार्यालय धुम्बाराहीस्थित चप्पल कारखाना नजिकै थियो । तर मिश्र नेतृत्वको साझा पार्टीसँग एकता गरेपछि एकीकृत पार्टी ‘विवेकशील साझा’को केन्द्रीय कार्यालय ललितपुरस्थित बखुन्डोलमा राख्ने निर्णय भयो । बखुन्डोलमा नयाँ कार्यालय स्थापना भएसँगै पूर्व विवेकशीलको चप्पलकारखाना स्थित कार्यालय बन्द भएको थियो । शुक्रबार नयाँ पार्टी दर्ताको निवेदन दिएसँगै थापा नेतृत्वको समूहलाई नयाँ कार्यालय खोज्ने वा विवेकशील साझाको बखुन्डोलस्थित कार्यालय दावी गर्ने चुनौती थपिएको छ ।

मिश्र नेतृत्वको साझा पार्टीसँग एकीकृत भएपछिको १७ महिनामा पार्टीले गरेको आम्दानी  बांडफांड गर्नुपर्ने आवाज पनि उज्ज्वल समूहमा उठिरहेको छ । ‘त्यो आय संयुक्त आय हो, त्यसमा हाम्रो पनि हक लाग्छ,’ विवेकशीलका एक नेताले भने, ‘त्यसविषयमा हामीबीच छलफल हुनेछ ।’