काठमाडौं– मन्त्रिपरिषद्ले केही दिन अघि स्वीकृत गरेको सार्वजनिक पदमा रहेका व्यक्तिहरूको मर्यादाक्रमको सांसदरुले आलोचना गरेका छन् । 

आइतबार प्रतिनिधि सभा बैठकको शून्य समयमा बोल्दै नेकपाका सांसदद्वय हरिराज अधिकारी र पूर्वमन्त्री समेत रहेका हरिबोल गजुरेलले सरकारले जारी गरेको मर्यादाक्रमले आफूलाई अपमानित गरेको भन्दै असन्तुष्टि प्रकट गरेका छन् । 

‘सार्वजनिक गरिएको मर्यादाक्रमले अपमानित महसुश गरेका छांै’’ गोरखा १ बाट निर्वाचित नेकपा सांसद हरिराज अधिकारीले संसदमा भनेका थिए, ‘यसमा पुनर्विचार गर्नुपर्छ ।’ 

लोकान्तरसँग कुराकानी गर्दै सांसद अधिकारीले मर्यादाक्रमको नौ नम्बरमा उल्लेख गरिएको प्रावधानप्रति असहमति रहेको बताए । ‘संघीय संसद सदस्यहरूको मर्यादाक्रम र प्रदेश मन्त्रीको मर्यादाक्रम एकै स्तरको हुन सक्दैन,’ अधिकारीले भने, ‘संघीय संसदको मर्यादा कम्तिमा पनि प्रदेश मुख्यमन्त्री सरह हुनुपर्छ, यसलाई सच्याइनुपर्छ ।’

मन्त्रिपरिषदले स्वीकृत गरेको मर्यादाक्रमको ९ नम्बरमा नेपाल सरकारका सहायक मन्त्री, प्रदेश सरकारका मन्त्री, प्रतिनिधि सभाका सदस्य, राष्ट्रिय सभाका सदस्य, प्रदेश सरकारका राज्यमन्त्री, प्रदेशसभाका उपसभामुख, प्रदेश सभाका विभिन्न समितिका सभापति, काठमाडौँ महानगरपालिकाका प्रमुख, संविधानसभाका सदस्य, पूर्व सांसद, नेपाल सरकारका मुख्य सचिव र सेनापति रहने उल्लेख गरिएको छ ।

नेकपाकै अर्का सांसद हरिबोल गजुरेलले पनि नयाँ मर्यादाक्रमप्रति असन्तुष्टि व्यक्त गरे । ‘मर्यादाक्रमले धेरै बिवाद भएको छ’ आइतबार संसदमा बोल्दै गजुरेलले भने,‘सरकारले हरेक निर्णय हचुवाले गर्ने र पछि हट्ने गरेको छ, यस्तो हुनु हुँदैन ।’

मन्त्रिपरिषदले स्वीकृत गरेको नयाँ मर्यादाक्रममा क्रमशः  राष्ट्रपति, उपराष्ट्रपति, प्रधानमन्त्री, प्रधानन्यायाधीश, प्रतिनिधिसभाका सभामुख, राष्ट्रिय सभाका अध्यक्ष, पूर्वराष्ट्रपति, उपप्रधानमन्त्री, पूर्वउपराष्ट्रपति, पूर्वप्रधानमन्त्री, मन्त्रिपरिषदका पूर्वअध्यक्ष, प्रदेश प्रमुख तथा त्यसपछि केन्द्रीय मन्त्री र मुख्यमन्त्री छन् । 

पुस २३ को मन्त्रिपरिषदको निर्णय अनुसार यसअघि सरकारको मुख्य सचिवभन्दा पछाडि पारिएका प्रदेशसभाका सभामुख, प्रदेश सरकारका मन्त्रीको मर्यादाक्रम एक तह माथि सारिएको छ । प्रदेश सभामुखलाई केन्द्रीय राज्यमन्त्रीसरह राखिएको छ भने प्रदेश मन्त्रीलाई केन्द्रीय सहायकमन्त्रीसरह राखिएको छ ।