काठमाडौं— युरोपेली संघ (ईयू) बाट बहिगर्मनबारेको असहमतिका कारण बेलायती राजनीति गम्भीर मोडमा पुगेको छ । प्रधानमन्त्री टेरेजा मेले प्रस्ताव गरेको ब्रेक्जिट डिलबारे बेलायती संसद् ‘हाउस अफ कमन्स’ मा आज साँझ स्थानीय समयअनुसार ७ बजे मतदान हुँदै छ ।

यसअघि गत डिसेम्बर ११ का लागि मतदान तोकिएको थियो । तर प्रधानमन्त्री मेले आफ्नो प्रस्ताव विफल हुने सम्भावनाबीच मतदानको मिति करिब एक महिना पछि सारेकी हुन् । मेले राखेको प्रस्ताव संसद्ले अस्वीकृत गर्ने विश्लेषण गरिएको छ । सत्तारुढ दलका सय र डीयूपी पार्टीका केही सांसदले मेको प्रस्तावविरुद्ध मतदान गर्ने अनुमान छ । 

प्रमुख विपक्षी दल लेबरका नेता जेरेमी को र्बिनले प्रधानमन्त्रीको प्रस्ताव संसद्बाट अस्वीकृत भए उनीविरुद्ध अविश्वास प्रस्ताव दर्ता गर्ने बताइसकेका छन् । यदि बेलायती राजधानीले त्यस्तो मोड लिएको खण्डमा प्रधानमन्त्री मेले ताजा जनादेशका लागि चुनाव गराउनुपर्ने दबाब झेल्नेछिन् ।