धरानकी अनुसा राईको बलात्कारपछि हत्या प्रकरण : वलिमान दम्पत्तिलाई जन्मकैदको फैसला

माघ १, २०७५

धरान– धरानकी अनुसा राई हत्या प्रकरणमा जिल्ला अदालत सुनसरीले २ जनाविरुद्ध जन्म कैदको फैसला सुनाएको छ । 

१३ वर्षीया बालिका राईको बलात्कार पछि हत्या अभियोगमा धरान–१६ का वलिमान राई र उनकी श्रीमती पदमकुमारी राईविरुद्ध जन्मकैदको फैसला सुनाइएको हो । 


ADVERTISEMENT

वलिमान र पदमकुमारीले अनुसा ६ वर्षको हुँदादेखि धर्मपुत्रीको रुपमा पालेका थिए । १६ फागुन २०७३ मा मृत अवस्थामा फेला परेकी अनुसाको वलिमानको परिवारले गोप्य रुपमा दाहसंस्कार गर्न लागेपछि स्थानीयले विरोध गरेका थिए । 

वलिमान दम्पत्तिले अनुसारले विष सेवन गरेर आत्महत्या गरेको भन्दै उनको दाहसंस्कार गर्न खोजेको थियो । तर, स्थानीयले अनुसाको हत्या भएको भन्दै विरोध प्रदर्शन गरेका थिए । अनुसाका लागि न्याय माग्न भएको आन्दोलका क्रममा स्थानीय र प्रहरीबीच झडप समेत भएको थियो । 

आन्दोलन चर्कँदै गएपछि स्थानीय प्रशासनले शवको परीक्षण गर्ने प्रतिवद्धता जनाएको थियो । बिपी कोइराला स्वास्थ्य विज्ञान प्रतिष्ठानका ४ जना फरेन्सिक विज्ञको टोलीले गरेको पोस्टमार्टमपछि अनुसाको बलात्कारपछि हत्या भएको तथ्य सार्वजनिक भएको थियो । 

अनुसाको बलात्कारपछि हत्या भएको तथ्य सार्वजनिक भएपछि प्रहरीले वलिमान र पदमकुमारीलाई नियन्त्रणमा लिएको थियो । 

जिल्ला अदालत सुनसरीले थुनछेक बहसपछि १४ चैत २०७३ मा वलिमान दम्पत्तिलाई पुर्पक्षका लागि थुनामा पठाउन आदेश जारी गरेको थियो । जिल्लाको आदेशविरुद्ध राई दम्पत्ति उच्च अदालत र सर्वोच्च अदालतमा पुनरावेदन दर्ता गरेपनि माथिल्लो तहका अदालतले जिल्लाकै आदेश सदर गरेका थिए । 

अन्ततः अनुसाको हत्या भएको २२ महिनापछि अदालतले वलिमान दम्पत्तिलाई दोषी ठहर गर्दै जन्मकैदको फैसला सुनाएको हो । 

सुनसरी जिल्ला अदालतका न्यायाधी खिमनन्द भुषालको इजलाशले वलिमान दम्पत्तिलाई दोषी ठहर गरी जन्मकैदको फैसला सुनाएको हो । 

मृतक बालिका अनुसार धरान–१३ बस्ने जीतबहादुर राईको माइली छोरी हुन् । उनी ६ वर्षकी हुँदा जन्मदिने आमा बितेपछि ०६५ सालमा धरान–१६ पुण्यमार्ग बस्ने ६० वर्षीय बलिमान राई र उनकी श्रीमती पदमकुमारी राईले धर्मपुत्रीको रुपमा पाल्ने भन्दै अभिभावकत्व लिएका थिए । 

तर, उनीमाथि पटक पटक हिंसा हुने गरेको स्थानीयले बताउने गरेका थिए । 

माघ १, २०७५ मा प्रकाशित

प्रतिक्रिया दिनुहोस