विराटनगर–  विराटनगर महानगरपालिका– ११ बरमपुरामा रहेको उखुबारीमा अचानक आगलागी भएको छ ।  

मंगलबार दिउँसो लागेको आगोले ८ विघामा रहेको उखु जलेर नष्ट भएको छ । विराटनगरका नागेश कोइरालाको उखुवारीमा आगो लागेको हो । आगलागीबाट करिब ४ लाख रुपैयाँ बराबरको उखु जलेर नष्ट भएको कोइरालाले बताए । 

५१ बिघा जग्गामध्ये १० विघा जमिनमा उखु खेती लगाएकोमा ८ बिगाहाको उखु जलेको उनले जानकारी दिए ।  ‘बारीमा रहेको उखु विक्री गर्ने तयारीमा थियौं,’  कोइरालाले भने , ‘तयारी उखु जलेर आधा भन्दा बढी पूर्ण रुपमा नष्ट भयो ।’

८ विगाहामा ४ हजार क्वीन्टल उखु उत्पादन हुने लक्ष्य रहेकोमा आधाभन्दा बढी आगो लागेर नष्ट भएको उनको भनाइ छ । 

दमकल जाने बाटो नहुँदा बढी क्षति

स्थानीय बासिन्दाका अनुसार आगलागी  भएको उखु खेतमा दमकल जाने बाढो नुहँदा बढी क्षति भएको छ ।  
‘आगो लागेको जानकारी पाएपछि दमकल समयमै आएको थियो,’ कोइरालाले भने, ‘आगो लागेको स्थानमा जानेबाटो नहुँदा बाटैमै बस्यो । जसको कारण उखु बढी क्षति हुन पुग्यो ।’

आगो लागेको २ घन्टापछि स्थानीय र प्रहरीको सहयोगमा आगो नियन्त्रणमा लिइएको थियो । स्थानीय तहरबाट पम्पबाट पानी तानेर आगो नियन्त्रणमा लिइएको थियो । 

जमिनमा उखु कृषक नागेश कोइराला नेपाली काँग्रेस मोरङका सचिब हुन् । उनले गत वर्ष मात्र १० लाख रुपैयाँ लगानी गरेर उखु रोपेका थिए ।