काठमाडौं— राष्ट्रिय शिक्षा नीति निमार्णका लागि गठित उच्चस्तरिय राष्ट्रिय शिक्षा आयोगले तयार पारेको प्रतिवेदन सरकारलाई बुझाएको छ । निजी विद्यालयलाई गैरनाफामूलक बनाउन सिफारिस गर्दै आयोगले प्रधानमन्त्री केपी शर्मा ओलीलाई मंगलबार प्रतिवेदन बुझाएको हो । 

आयोगका अध्यक्ष एवम् शिक्षा, विज्ञान तथा प्रविधिमन्त्री गिरिराजमणी पोखरेलले बालुवाटारमा प्रधानमन्त्री ओलीलाई प्रतिवेदन बुझाउँदै प्रतिवेदनमा निजी क्षेत्रका विद्यालयलाई सेवामूलक बनाउन सिफारिस गरिएको जानकारी गराए ।

प्रतिवेदनले सरकारी विद्यालयको गुणस्तर सुधार गर्ने र सरकारी कर्मचारी सबैका छोराछोरीलाई सरकारी विद्यालयमै पढाउनुपर्ने व्यवस्था गर्न पनि सुझाव दिएको छ । हाल कम्पनीमा दर्ता भएका निजी विद्यालयलाई सहकारी, सेवामूलक निजी तथा सामाजिक गुठीमा दर्ता हुन प्रोत्साहित गर्दै भविष्यमा सेवामूलक निजी विद्यालय मात्रै रहने प्रबन्ध हुनुपर्ने आयोगको प्रतिवेदनमा उल्लेख छ ।

प्रतिवेदन बुझ्दै प्रधानमन्त्री ओलीले गुणस्तरीय शिक्षाका लागि अबदेखि नीजि क्षेत्र नै धाउनुपर्ने बाध्यताको अन्त्य गर्ने र सामुदायिक विद्यालयको शैक्षिक स्तरमा व्यापक परिवर्तन गर्ने बताए । सरकारी विद्यालय गुणस्तरीय बनेपछि कोही पनि निजी विद्यालय नजाने उनको दाबी छ ।

इजरायलले नेपाली कामदारको कोटा बढाउने 
ठूलो संख्यामा नेपाली कामदारलाई रोजगारीको अवसर प्रदान गर्न इजरायल सरकार सकारात्मक देखिएको छ । नेपाली कामदार मिहेनती, इमान्दार र अनुशासित भएका कारण नेपाली कामदारको सङ्ख्या बढाउन इजरायल सरकार सकारात्मक भएको हो । 

श्रम, रोजगार तथा सामाजिक सुरक्षामन्त्री गोकर्ण विष्टसँग नेपालका लागि इजरायलका राजदूत बेन्नी अमेरले मंगलबार गरेको भेटमा नेपाली कामदारलाई थप रोजगारीको अवसर प्रदान गर्न इजरायल सरकार तयार रहेको बताए । श्रम सम्बन्धको माध्यमबाट नेपाल र इजरायलबीचको द्विपक्षीय सम्बन्धलाई अझै प्रगाढ बनाउन सकिने मन्त्री विष्टले बताएको श्रम, रोजगार तथा सामाजिक सुरक्षा मन्त्रालयले जनाएको छ ।

जग्गा बाँझो राखे ३ लाख जरिवाना
सरकारले लगातार ३ वर्षभन्दा बढी जग्गा बाँझो राख्न नपाउने कानूनी व्यवस्था ल्याउन लागेको छ । संसद्मा सोमबार दर्ता गरिएको भूउपयोगको सम्बन्धमा व्यवस्था गर्न बनेको विधेयकमा तीन वर्षदेखि जग्गा बाँझो राख्ने जग्गाधनीलाई तीन लाख रुपैयाँसम्म जरिवाना हुने प्रावधान छ ।

यो विधेयकमाथि प्रतिनिधिसभामा एक साताभित्रै छलफल हुनेछ । विधेयक पारित भएपछि आफ्नो जग्गा बाँझो राख्नुपर्ने भए स्थानीय तहमा बाँझो राख्न पर्नाको कारण जानकारी दिनुपर्नेछ । ‘धेरै जग्गा हुने व्यक्ति जग्गा बाँझो राखेर अन्तै गएर बस्न थालेका छन्,’ भूमि व्यवस्था सहकारी तथा गरिबी निवारण मन्त्रालयका सचिव गोपी मैनालीले भने, ‘यसले कृषि उत्पादनमा कमी आयो । भूउपयोग पनि पूर्ण रूपमा हुन सकेन । 

त्यसैले बाँझो राख्नेलाई कसुर गरेको मानिने व्यवस्था ल्याउनुपरेको हो।’ जग्गाको उपयोग होस् र उत्पादनशील क्षमतामा ह्रास नआओस् भनेर नयाँ व्यवस्था ल्याउन लागेको उनले बताए । व्यक्तिको नाममा रहेको ३ करोड कित्तामध्ये कति जग्गा बाँझै छ भन्ने सरकारसँग यकिन तथ्यांक छैन । भूमि वर्गीकरण, उपयोग र प्रभावकारी व्यवस्थापन गर्न सरकारले यो विधेयक ल्याएको जनाएको छ ।, कान्तिपुरमा खबर छ।

छापामार शैलीमा पार्टी फुटाएको विवेकशिल साझाको आरोप
विवेकशील साझा पार्टीले तत्कालिन संयोजक उज्जल थापा समूहले छापामार शैलीमा पार्टी फुटाएको आरोप लगाएको छ । पार्टी कार्यालय बखुण्डोलमा मंगलबार पत्रकार सम्मेलन गरेर साझाका प्रवक्ता डा. सूर्यराज आचार्यले डेढ वर्षसँगै काम गरेकाहरुले थाहै नदिई छापामारा शैलीमा पार्टी फुटाएको निष्कर्ष केन्द्रीय कार्य समिति बैठकले निकालेको जानकारी गराए । 

थापा समूहले नियोजितरुपमा पार्टी फुटाउन खोजेको र सोही कारण केन्द्रिय समितिको बैठकमा उपस्थित हुनुभन्दा पहिले नै नयाँ पार्टी दर्ता प्रकृया शुरू गरेको साझाको निष्कर्ष छ । साझाको सोमबार र मंगलबार दुई दिन बसेको केन्द्रीय समिति बैठकले पार्टीको पहिलो महाधिवेशन २०७६ सालको फागुन १५ देखि १९ गतेसम्म काठमाडांैमा गर्ने निर्णय गरेको छ । 

चारपाङ्ग्रे सवारीसाधनको प्रवेशमा रोक
भक्तपुर नगरपालिकाले सम्पदास्थलमा मंगलबारदेखि चार पाङ्ग्रे सवारी साधनलाई प्रवेशमा रोक लगाएको छ । विश्व सम्पदा सूचीमा सूचीकृत पाँचतले मन्दिर परिसरमा चारपाङ्ग्रे सवारी प्रवेशमा रोक लगाएको नगरपालिकाका प्रमुख सुनील प्रजापतिले जानकारी दिए । सवारीसाधन रोक्नका लागि पूर्वमा साकोठा जाने चोक र पश्चिममा गःहिटी जाने बाटोमा सिक्री लगाइएको छ ।

पाँच सेनेगल नागरिक पक्राउ
प्रहरीले शङ्कास्पद वस्तुसहित पाँच सेनेगल नागरिकलाई काठमाडौँबाट पक्राउ गरेको छ । विभिन्न वनस्पति औषधि, नक्कली कपाल ३० थान, सिद्रा माछा चार पोका, खरायोको सुकुटी, वनस्पति झार दुई पोका र पीठो दुई पोकासहित उनीहरूलाई नियन्त्रणमा लिइएको प्रहरीले जनाएको छ । 

पक्राउ पर्नेमा सेनेगल नागरिक ३६ वर्षीय गेया मामाजु, ३४ वर्षीय सेला मोहमद र ३२ वर्षीय सिद्दे सोलेलगायत छन् । उनीहरूलाई महाराजगञ्जस्थित साम्बाला होटलबाट नियन्त्रणमा लिएको हो ।

त्रुटिपूर्ण भर्ना प्रक्रिया तत्काल सच्याउन माग
अनेरास्ववियू (क्रान्तिकारी) ले त्रिभुवन विश्वविद्यालयअन्तर्गत कृषि तथा पशुविज्ञान अध्ययन संस्थानको भर्ना प्रक्रिया त्रुटिपूर्ण रहेको भन्दै अविलम्ब सच्याउन माग गरेको छ । क्रान्तिकारीका अध्यक्ष रञ्जित तामाङ नेतृत्वको टोलीले विश्वविद्यालयका उपकुलपति प्राडा तीर्थ खनियाँलाई ज्ञापनपत्र बुझाउँदै नयाँ भर्ना प्रक्रिया अघि बढाउन आग्रह गरेको हो ।

क्रान्तिकारीले गत पुस २४ गतेको सूचनाका आधारमा तोकिएको स्नातक तहको भर्नाअन्तर्गत कोटा प्रणालीको लागि गरिएको भर्ना अन्त्यन्त अवैज्ञानिक र अव्यवहारिक भई त्रुटि भएको जनाएको छ ।

संकटा खप्तड गोल्डकप फुटवलको सेमिफाइनल प्रवेश
संकटा क्लब खप्तड गोल्डकप फुटबल प्रतियोगिताको सेमिफाइनलमा प्रवेश गरेको छ । धनगढीस्थित क्षेत्रीय रंगशालामा मंगलबार भएको क्वाटरफाइनलमा क्यामरुनको दाफिनास एफसी क्लबलाई १—० गोल अन्तरले पराजित गर्दै संकटा अन्तिम चारमा प्रवेश गरेको हो । संकटाले बिहीवार फाइनल प्रवेशका लागि विभागिय टोली नेपाल पुलिस क्लबको सामना गर्नेछ । 

प्रतियोगिताका सेमिफाइनल खेलहरु बुधबारदेखि शुरु हुनेछन् । पहिलो सेमिफाइनल खेलमा आज थ्रिस्टार क्लबले मेचि नेत्रालय काकँडभिट्टा फुटबल ट्रेनिङ सेन्टरसँग प्रतिस्पर्धा गर्नेछ ।