काठमाडौं— माघे संक्रान्तिका अवसरमा मंगलबार भएको गोरु जुधाइले विदेशी सञ्चारमाध्यममा समेत ठाउँ पाएको छ । चीनको सिन्ह्वा अनलाइन संस्करणले नेपालको प्राचीन गोरु जुधाइ महोत्सव भन्ने शीर्षकमा तस्वीर सहितको समाचार छापेको छ । 

नुवाकोट र धादिङमा १९औं शताप्दीको झल्को दिने गरी गोरु जुधाइ आयोजना गरिएको समाचारमा उल्लेख छ । मंगलबार विभिन्न जिल्लामा गोरु जुधाइ मेला आयोजना गरिएको थियो । नुवाकोटको तारकेश्वर गाउँपालिका–२ स्थित तारुकाको चन्दनी, विदुर नगरपालिका १० बेत्रावती र पञ्चकन्या गाउँपालिकाको घलेभञ्ज्याङमा गोरु जुधाइएको थियो ।

जिल्लाका विभिन्न स्थानमा पहिले गोरु जुधाउने गरिएकामा नुवाकोटको तारुकाले व्यवस्थित रूपमा २०६२ सालबाट गाउँभरिका जुरे बहर गोरु एकै थलोमा जुधाउने चलनको शुरुवात गरेको हो ।