काठमाडौं - सरकारले पूर्वप्रधानमन्त्री गिरिजाप्रसाद कोइरालाको नाममा खुल्न लागेको अस्पताल विघटन गर्न खोजेको भन्दै कांग्रेसले आपत्ति जनाएको छ ।

राष्ट्रियसभाको बुधवारको बैठकमा विशेष समय लिएर बोल्दै कांग्रेस सांसद सुरेन्द्रराज पाण्डेले पूर्वप्रधानमन्त्री कोरालाको नेतृत्वमा तनहुँमा खोल्न लागिएको श्वास प्रश्वास सम्बन्धी अस्पताल सरकारले विघटन गर्न खोजेको भन्दै आपत्ति जनाएका हुन् ।

प्रमुख सत्तारुढ दल नेकपाका अध्यक्ष पुष्पकमल दाहाल प्रचण्डले कांग्रेसका पूर्वसभापति समेत रहेका कोइरालाले नेपालको शान्ति प्रक्रियामा खेलेको भूमिकाको पटक-पटक स्मरण गर्ने गरेको सन्दर्भ उल्लेख गर्दै पाण्डेले उनकै पार्टी नेतृत्वको सरकारले कोरालाको नामको अस्पताल विघटन गर्न लागेको आरोप लगाए ।

सरकार निकै असहिष्णु बनेको आरोप लगाउँदै उनले कांग्रेस तर्साएर नतर्सिने बताए । 'विगतमा धेरैले कांग्रेसलाई तर्साउन खोजे । राणाले तर्साउन खोजे, पञ्चायतले तर्साउन खोजे, माओवादीको बन्दुकले तर्साउन खोज्यो तर तर्सिएन,' पाण्डेले भने । प्रतिपक्षलाई निषेध नगर्न सरकारलाई उनको सुझाव छ ।

कांग्रेस वरिष्ठ नेता रामचन्द्र पौडेलले पनि सोमवार पत्रकार सम्मेलन गर्दै पूर्वप्रधानमन्त्री द्वय गिरिजाप्रसाद कोइराला र सुशील कोइरालाको नाममा खोल्न लागिएका अस्पताल विघटन गर्न लागिएको भन्दै आपत्ति जनाएका थिए ।