काठमाडौं — सिरियाका एक व्यक्तिले विगत ३५ वर्षदेखि एकै रंगको कपडा दिनदिनै लगाइरहेका छन् । अलेप्पोमा बस्ने अबु जाककौरले पहेंलो रंगको कपडा लगाएरै ३५ वर्ष कटाएका हुन् । उनलाई पीतमानव भनेर बोलाउने गरिएको छ । 

सन् १९८३ को जनवरी २५ बाट उनले यो हर्कत गर्न थालेका हुन् । त्यसदिन उनले अबदेखि पहेंलो लुगा मात्र लगाउँछु भनी संकल्प गरे । 

उनका अनुसार, पहेंलो रंग प्रेमको निशानी हो । रमाइलो कुरा त, अबु पहेंलो रंगको कपडा लगाउने मात्र नभई पहेंलो अन्डरवेयर, टाई, टोपी, छाता, मोबाइल फोन कभर प्रयोग गर्छन् । 

कुनै कुरा पहेंलो रंगमा भेटिएन भने उनी त्यसलाई पहेंलो बनाइदिन्छन् । उनी भन्छन्, ‘कसैले पनि यस्तो काम गरेको छैन । तर पहेंलो रंग अपनाएर म प्रेमको सन्देश दिइरहेको छु ।’

उनी थप्छन्, ‘अरू रंगका कपडामा म अफबीट अनुभव गर्छु । म ३५ वर्षदेखि पहेंलो रंगको कपडा नै लगाइरहेको छु । अब अर्को रंगका बारेमा म सोच्न पनि सक्दिनँ ।’

रमाइलो कुरा के भने अबुको घरमा पनि तन्ना, टेबलपोश, भान्साको टेबल, फोहरदानी सबैथोक पहेंलो छ । 

युद्धग्रस्त सिरियामा मानिसले अबुलाई चिन्न थालिसकेका छन् । उनका विषयमा भ्रम पनि फैलिएका छन् । उनलाई आतंकवादी संगठनको सदस्य भएको हल्ला पनि चल्ने गरेको छ । 

अबु भन्छन्, ‘म सडकमा टहल्दा मानिसहरू मुस्काउँछन् । कोही मसँग फोटो खिचाउँछन्, कोही मलाई जोक सुनाउन आउँछन् । यही त हो प्रेम ।’

एजेन्सी