काठमाडौं – सेवाग्राहीबाट १५ हजार रुपैयाँ घुस लिएको अवस्थामा पक्राउ परेका नेपाल विद्युत् प्राधिकरणका सुपरभाइजर र हेल्परविरुद्ध अख्तियार दुरुपयोग अनुसन्धान आयोगले विशेष अदालतमा आरोपपत्र दायर गरेको छ ।

नेपाल विद्युत् प्राधिकरण नोलाइट शाखा मूलपानीका इलेक्ट्रिकल सुपरभाइजर बद्रीनाथ न्यौपाने, हेल्पर काले थापामगर र ज्यालादारीमा काम गर्ने बिदुर पुडासैनीविरुद्ध अख्तियारले आरोपपत्र दायर गरेको हो ।

अख्तियारका प्रवक्ता सहसचिव रामेश्वर दंगालका अनुसार  सेवाग्राहीको जग्गाबाट बिजुलीको तार हटाइदिन घुस लिएको अवस्थामा प्राधिकरणका कर्मचारीलाई पक्राउ गरिएको थियो ।

तीनै कर्मचारीले एकआपसमा मिलेमतो गरी विभिन्न बहाना बनाई घुस रकम लिई भ्रष्टाचार निवारण ऐन, २०५९ को दफा ३ को उपदफा (१) बमोजिम कसुर गरेको पुष्टि भएको बताउँदै अख्तियारले जनही बिगो १५ हजार रुपैयाँ कायम गरी भ्रष्टाचार निवारण ऐन, २०५९ को दफा ३ को उपदफा (१) र सोही दफाको उपदफा (१) को देहाय (क) बमोजिम जरिवाना र कैद सजाय मागदाबी गर्दै आरोपपत्र दायर गरेको छ ।