काठमाडौं — केन्याको राजधानी नैरोबीमा मंगलवार सोमाली लडाकूहरूले एक विलासी होटलमा गरेको आक्रमणमा परी मर्नेको संख्या २१ पुगेको केन्याली सरकारले पुष्टि गरेको छ । 

डुसिटडी२ होटल र बिजनेस कम्प्लेक्समा भएको रक्तपातमा सयौं मानिस भाग्न बाध्य भएका थिए । 

घाइते भएका २८ जनालाई अस्पतालमा भर्ना गरिएको छ । केन्याको रेडक्रसले १९ जना अझै हराइरहेको बतायो । 

सोमालियामा रहेको इस्लामी समूह अल–शबाबले आक्रमणको जिम्मेवारी लिएको छ । आक्रमणपछि १९ घण्टासम्म सैन्य कारवाही चलेको थियो । 

राष्ट्रपति उहुरु केन्याट्टाले पाँचजना जिहादी आक्रमणकारीहरूलाई सिध्याइएको बताए । 

अल–शबाबले अक्टोबर २०११ देखि केन्यालाई तारो बनाउँदै आएको छ । केन्याले सोमालियामा सेना पठाएर जिहादी समूहविरुद्ध लड्न थालेपछि तारो बनेको हो । 

तर्सिएका नागरिकको समूहलाई सुरक्षा बलहरूले मंगलवार रातभरि लगाएर सुरक्षित ठाउँमा सारेका थिए । बुधवार बिहानसम्म पनि घरिघरि गोली चलेको र बम विस्फोट भएको थियो । धेरै मानिस घण्टौंसम्म आफ्नो कार्यालय र बाथरूममा लुकिरहे । 

विशाल बिजनेस कम्प्लेक्सबाहिरको भीडभाडयुक्त सडकमा कम्प्लेक्सभित्र फसेका मानिसका नातेदार र साथीभाइले उनीहरू बाहिर आएपछि अँगालो हालेका थिए र केन्याली सुरक्षा बललाई धन्यवाद दिए । 
मृतकहरूका आफन्तले शवको अन्तिम संस्कार गर्न थालेका छन् ।

बीबीसीबाट