काठमाडौं — युभेन्टस क्लबका स्टार क्रिस्टियानो रोनाल्डोले प्रतिस्पर्धात्मक प्रतियोगिताको फाइनलमा गोल गर्ने आफ्नो रेकर्ड कायम राख्दै बुधवार आफ्नो क्लबलाई सुपरकोप्पा जिताएका छन् । 

साउदी अरबको जेद्दाहमा मिलानविरुद्ध खेलिएको फाइनलमा रोनाल्डोले ६१औं मिनेटमा हेडरमार्फत गोल गरेर युभेन्टसलाई १–० को जीत दिलाए । युभेन्टस क्लबका लागि रोनाल्डोले पहिलो उपाधि जितेका हुन् । सन् २००७ पछि यो

सबभन्दा कम स्कोरको सुपरकोप्पा फाइनल रह्यो । 

यो गोलसँगै रोनाल्डोले विगत सात फाइनलमा आठ गोल गरेका छन् । 

यी ३३ वर्षीय खेलाडीले रियाल मड्रिड क्लबलाई लगातार तीनपटक च्याम्पियन्स लीग उपाधि दिलाउन प्रमुख भूमिका खेलेका थिए । विगत तीन सीजनमा मड्रिडलाई फाइनलमा जिताउने क्रममा उनले दुई गोल गरेका थिए । 

च्याम्पियन्स लीगका फाइनलहरूका अतिरिक्त रोनाल्डोले बार्सिलोनाविरुद्ध सन् २०१७ को स्पेनिश सुपर कपमा पनि गोल गरे र दुईवटा क्लब वर्ल्ड कप फाइनलमा चारवटा गोल गरे : सन् २०१६ मा काशिमा एन्ट्लर्सविरुद्ध र सन् २०१७ मा ग्रेमियोविरुद्ध । 

बुधवारको सुपरकोप्पा जीतसँगै रोनाल्डोले युभेन्टसका लागि पहिलो सीजनमा बलियो प्रदर्शन कायम राखेका छन् । उनले युभेन्टसका लागि सबै प्रतियोगितामा खेल्ने क्रममा १६ गोल गरेका छन् । 

खेलको अन्त्यपछि राइ स्पोर्टसँग कुरा गर्दै युभेन्टसका व्यवस्थापक मास्सिमिलियानो अलेग्रीले रोनाल्डोको प्रशंसा गर्दै उनले गर्ने निर्णायक गोलका कारण नै क्लबले उनलाई भित्र्याएको बताए । 

‘उनले उत्कृष्ट गोल गरे अनि मैदानमा राम्ररी दौडिए । त्यसो त पूरै टीमले राम्रो प्रदर्शन गरेको थियो । काउन्टरअट्याकहरू भए । हामीले पाउलो डीबालाको जस्तो मुभ अझै बढी बनाउनुपर्थ्यो । त्यसको साटो हामीले मैदान हतार गर्दा

मिलानलाई काउन्टर हान्ने मौका दियौं जसले गर्दा हामीले डिफेन्ड गर्नका लागि दाडिनुपर्‍यो ।’

युभेन्टस र मिलान यो खेलअघि सबभन्दा बढीचोटि सुपरकोप्पा जित्ने टोली थिए । उनीहरू दुवैले सात सातपटक कप जितेका थिए । तर हिजोको जीतसँगै आठवटा कपका साथ युभेन्टस पहिलो स्थानमा छ । 

मिलानको कुरा गर्दा उक्त क्लबले युभेन्टसविरुद्ध गोल नगरेको तीनवटा म्याच भइसकेको छ । अनि यस सीजनमा विभिन्न प्रतियोगितामा गोलपोस्टमा उनीहरूको १० चोटि बल ठोकिसकेको छ । 

गोल डट्कमबाट