काठमाडौं – इन्टरनेट सेवा प्रदायक कम्पनीले विद्युत् प्राधिकरणका पोल र ओपीजीडब्लू फाइबर प्रयोगमा गरेको भाडाबृद्धिप्रति इन्टरनेट सेवा प्रदायक संघ नेपालले आपत्ति जनाएको छ ।

प्राधिकरणका पोल र फाइबरलाई इन्टरनेट कम्पनीहरूले प्रयोग गर्ने गरेका छन् । जसमा प्राधिकरणले चालू आर्थिक वर्ष २०७५/०७६ मा ५००% भाडाबृद्धि गरेको छ ।

संघका अध्यक्ष भोजराज भट्टले विज्ञप्ति जारी गर्दै गम्भीर ध्यानाकर्षण भएको जनाएको छ । ‘हामी इन्टरनेट सेवा प्रदायकहरूले हाल कायम रहेको ग्राहकसँग लिने इन्टरनेट सेवाको शुल्क पुरानो भाडादरलाई आधार (खर्च) मानी दिइरहेकोमा नयाँ भाडादरले हामी सेवा प्रदायकहरूलाई ठूलो अन्योल सिर्जना गरेको छ्र,’ विज्ञप्तिमा लेखिएको छ ।

विज्ञप्तिमा अगाडि लेखिएको छ, ‘नेसनल ब्रोडब्यान्ड पोलिसीमा पनि इन्टरनेट शुल्कलाई अझ सुपथ मूल्यमा उपलब्ध गराउने भन्ने उल्लेख गरिएको छ । त्यही अनुरुप गत आर्थिक वर्षको बजेटमा लागू गरिएको १३% दूरसञ्चार सेवा शुल्कलाई पनि सञ्चार तथा सूचना प्रविधि मन्त्रालय, नेपाल दूरसञ्चार प्राधिकरण र इन्टरनेट सेवा प्रदायक संघले आपसी समझदारीमा समायोजन गर्ने सहमति कार्यान्वयन भइसकेको जानकारी अवगत नै होला । साथै सो सहमतिमा कुनै पनि सरकारी निकायले इन्टरनेटमा शुल्कबृद्धि हुने खालका काम कारवाही नगर्ने समेत उल्लेख छ ।’

प्राधिकरणले बृद्धि गरेको भाडादर सहमति विपरीत भएको बताउँदै संघले सबै सेवा प्रदायकले नयाँ भाडादर स्वीकार नगर्ने निर्णय गरेको जनाएको छ । ‘नेपाल विद्युत् प्राधिकरणले हामी सेवा प्रदायकको सेवामा अवरोध सिर्जना गरेमा त्यसको सम्पूर्ण जिम्मेवारी विद्युत् प्राधिकरणको नै हुने जानकारी गराउँछौं,’ विज्ञप्तिमा उल्लेख छ ।

समस्याको उचित निकास तथा समाधानको लागि सञ्चार तथा सूचना प्रविधि मन्त्रालय, नेपाल दूरसञ्चार प्राधिकरण, नेपाल विद्युत् प्राधिकरण र इन्टरनेट सेवा प्रदायक संघ नेपाल सम्मिलित उच्च स्तरीय समिति गठन गर्न संघले माग गरेको छ ।