काठमाडौं — इस्लामिक स्टेट (आईएस) ले जिम्मेवारी लिएको एक आत्मघाती आक्रमणमा परी उत्तरपूर्वी सिरियामा चारजना अमेरिकीहरू मारिएका छन् । अमेरिकी राष्ट्रपति डोनल्ड ट्रम्पले आतंकवादी समूह पराजित भएको त्यसैले

अमेरिकी सेना फिर्ता लाने भनी दाबी गरेको केही हप्तामै यो आक्रमण भएको हो । 

विस्फोट गराउने व्यक्तिले मनबिज शहरमा एक रेस्टुराँमा आक्रमण गरेका थिए । त्यहाँ अमेरिकी सैनिकहरू नियमित रूपमा भेला हुने गर्थे । 

आक्रमणमा १६ जना मारिएका छन् । सिरियामा अमेरिकी सैनिकहरूमाथि लक्षित गरिएको विगत चार वर्षमा यो सबभन्दा ठूलो आक्रमण हो । 

यूएस सेन्ट्रल कमान्डले दुई अमेरिकी सैनिक, रक्षा मन्त्रालयका एक नागरिक अधिकारी र मन्त्रालयका एक ठेकेदार मारिएका छन् । तीन सैनिक घाइते भएको कमान्डले वक्तव्य जारी गर्दै बतायो । 

एक स्थानीय कुर्दिश न्युज साइटमा प्रकाशित तस्वीरमा दुईवटा क्षतविक्षत शरीर देखिन्छन् । अन्य थुप्रै लाश भुइँमा लडिरहेको अनि मानिसहरू त्यहाँ भेला भएको देखिन्छ । भवन र गाडीमा क्षति पुगेको छ अनि पर्खालमा रगत लत्पतिएको देखिन्छ ।

आईएसले आफ्नो प्रचार शाखा अम्माकमार्फत आक्रमणको जिम्मेवारी लिएको छ । मनबिजबाट आईएस एक संगठित बलका रूपमा नरहेपनि स्लीपर सेलहरू छन् र तिनले स्थानीय अधिकारी र विपक्षी लडाकूहरूमाथि आक्रमण गर्ने गरेका छन् । 

अमेरिकाका ट्रकहरू सिरियाबाट प्रस्थान गरेको केही दिनपछि यो विस्फोट भएको हो । यसबाट उत्तरपूर्वी सिरियामा अस्थिरतालाई देखाएको छ । 

सिरियाबाट सैनिक फिर्ता लग्ने ट्रम्पको निर्णयको विरोध गर्नेहरूलाई यो आक्रमणले मसला दिएको छ । 

द गार्डियनबाट