काठमाडौं — तीनजना उत्तर कोरियाली अधिकारीहरूले वाशिङटन जाने विमानको टिकट काटेको दक्षिण कोरियाली सञ्चारमाध्यमले बुधवार जनाएका छन् । अमेरिकाका राष्ट्रपति डोनल्ड ट्रम्प र उत्तर कोरियाली नेता किम जोङ–उनबीचको दोस्रो शिखरवार्ताको तयारीका लागि उनीहरू त्यहाँ जान लागेको सम्भावना छ ।

अमेरिकाका परराष्ट्रमन्त्री माइक पम्पिओ र वरिष्ठ उत्तर कोरियाली अधिकारी किम योङ–चोल शुक्रवार वाशिङटनमा भेटेर शिखरवार्ताका लागि वातावरण मिलाउन लागेको अमेरिकी र दक्षिण कोरियाली सञ्चारमाध्यमहरूको भनाइ छ । 

ह्वाइट हाउस र अमेरिकाका परराष्ट्र मन्त्रालयले यो समाचारलाई पुष्टि गर्न मानेनन् । अन्तिम समयमा भेटवार्ता रद्द हुनसक्ने पीरले शायद पुष्टि नगरिएको हो । पम्पिओले आफ्ना समकक्षीसँग दोस्रो शिखरवार्ताका लागि नोभेम्बर महिनामा भेट्ने योजना बनाएका भए पनि परराष्ट्र मन्त्रालयले घोषणा गरेको एक दिनपछि नै रद्द गरेको छ । 

ट्रम्प किमसँग दोस्रो शिखरवार्ताका लागि इच्छुक छन् । तर अमेरिकाका उपराष्ट्रपति माइक पेन्सले उत्तर कोरियालाई निःशस्त्रीकरणका लागि विश्वस्त तुल्याउने दिशामा अघि बढ्न नसकिएको स्वीकार गरे । 

दक्षिण कोरियाको समाचार संस्था योन्हापले एक अज्ञात चिनियाँ एयरपोर्ट अधिकारीलाई उद्धृत गर्दै किम योङ–चोल, उत्तर कोरियाका परराष्ट्र राज्यमन्त्री चोए सोन–हुई र अर्का एक अधिकारी बिहीवार बेइजिङबाट वाशिङटनका लागि प्रस्थान गर्ने खबर दियो । 

द गार्डियनबाट