काठमाडौं — अमेरिकी संसद्को तल्लो सदनकी सभामुख न्यान्सी पेलोसीले राष्ट्रपति डोनल्ड ट्रम्पको वार्षिक स्टेट अफ द युनियन सम्बोधनमा रोक लगाएकी छन् ।

पेलोसीले सरकारी काम ठप्प भएको अवस्थामा ट्रम्पको जनवरी २९ को सम्बोधन सम्भव नभएको भनी पत्र लेखिन् । 

शटडाउनका कारण यो कार्यक्रमका लागि पर्याप्त विशेष सुरक्षा उपलब्ध गराउन सम्भव नरहेको किनकि सिक्रेट सर्भिस र होमल्यान्ड सेक्युरिटी विभागका कर्मचारीले २५ दिनदेखि तलब नपाएको पेलोसीले बताइन् । 

ट्रम्पले सम्बोधनको साटो लिखित सन्देश पठाउन सक्ने उनको भनाइ छ । सन् १९१३ सम्म लिखित सन्देशबाटै काम चलाउने गरिएको थियो । नत्र ट्रम्पले सरकारी कामकाज खुल्ने प्रतीक्षा गर्नसक्ने र त्यसपछि सम्बोधनका लागि नयाँ तारिख घोषणा गर्नसक्ने पनि विकल्प छ । 

तर होमल्यान्ड सेक्युरिटी सचिव क्रिस्टजेन नील्सनले उनको विभाग र सिक्रेट सर्भिस स्टेट अफ द युनियन कार्यक्रममा सुरक्षा दिन तयार रहेको बताए । ट्रम्पलाई सम्बोधनका लागि नबोलाइएमा उनले सम्भवतः टीभीमार्फत देशलाई सम्बोधन गर्नेछन् । 

अमेरिकी सरकारको कामकाज बिहीवार २७औं दिनसम्म पनि रोकिएको छ किनकि मेक्सिको सीमामा पर्खाल निर्माणका लागि फन्ड उपलब्ध नगराइएको विषयमा गतिरोध कायम छ । 

कंग्रेसमा डेमोक्रेटहरूले पर्खाल निर्माणका लागि ५.६ अर्ब डलरको बजेटलाई स्वीकृति दिन अस्वीकार गरेका छन् । तर ट्रम्पले पर्खाल निर्माणका लागि पर्याप्त फन्ड नपाउन्जेल बजेटलाई स्वीकृति नदिने बताएका छन् । बजेट नभएका कारण सरकारको कामकाज ठप्प छ ।

एजेन्सी