काठमाडौं– लोकसेवा आयोगले सरकारले हालसालै जारी गरेको नयाँ मर्यादाक्रमले संवैधानिक निकायहरुको अपमान गरेको निष्कर्ष निकालेको छ । 

आयोगको बिहीबार(आज) बसेको बैठकले सरकारले हालै जारी गरेको राष्ट्रिय जीवनका विभिन्न क्षेत्रमा रहेका महानुभावहरुको नयाँ मर्यादाक्रमप्रति गम्भीर ध्यानाकर्षण भएको जनाएको छ । 

आयोगले विशेषगरि संवैधानिक नियकाका पदाधिकारीहरुको मर्यादाक्रम साविकको भन्दा तल्लो क्रममा राखिएको भन्दै आपत्ति जनाएको छ । ‘संवैधानिक निकायका पदाधिकारीहरुको मर्यादाक्रम साविकको भन्दा निकै तल्लो क्रममा राख्नुले संवैधानिक पदाधिकारीहरुको मात्र अपमान नभइ समग्रमा संवैधानिक निकायहरुक संस्थागत मर्यादामा ह्रास आएको छ’ आयोगले जारी गरेको विज्ञप्तिमा भनिएको छ । 

मर्यादाक्रम निर्धारण गर्दा परम्परा प्रचलित कानून पदको भूमिका र गरिमालाई आधार मान्नुपर्नेमा कुनै मापदण्ड विना कसैलाई माथिल्लो क्रममा राख्ने अभिष्टले निर्माण भएको आयोगको ठहर छ । यो मर्यादाक्रमका कारण निजामती सेवा ऐन र नेपाल स्वास्थ्य सेवा ऐनमा व्यवस्था गरिएको बढुवा समितिको बैठकहरुमा आयोगका सदस्यहरुले भाग लिन समेत असहज स्थिति सिर्जना भएको आयोगले जनाएको छ ।

आयोगले पछिल्लो मर्यादाक्रमलाई संशोधन गरी संवैधानिक निकायका सदस्यहरुको मर्यादाक्रम साविकको जस्तै संवैधानिक निकायका प्रमुखहरुको लगत्तै कायम गर्न सरकारलाई आग्रह गरेको छ ।