काठमाडौं — उत्तर कोरियाका एक शीर्ष वार्ताकार अमेरिकी अधिकारीहरूलाई भेट्नका लागि वाशिङटन पुगेका छन् । उत्तर कोरियाका नेता किम जोङ–उन र अमेरिकाका राष्ट्रपति डोनल्ड ट्रम्पबीचको सम्भाव्य दोस्रो शिखरवार्ताको वातावरण मिलाउन उनी त्यहाँ पुगेका हुन् । 

किम योङ–चोल बेइजिङ हुँदै वाशिङटन गएका हुन् । उनले नेता किमको ट्रम्पलाई लेखिएको पत्र पनि लगेका छन् । 

उनले शुक्रवार अमेरिकी परराष्ट्रमन्त्री माइक पम्पिओसँग भेटघाट गर्ने अपेक्षा रहेको दक्षिण कोरियाको योन्हाप समाचार संस्थाले जनाएको छ । 

दोस्रो शिखरवार्ता भिएतनाममा हुने सम्भावना छ । 

किम कम्युनिस्ट मुलुक भिएतनाममा औपचारिक भ्रमणका लागि फेब्रुअरीमा पुग्ने तालिका रहेको रोयटर्स समाचार संस्थाले अज्ञात स्रोतहरूलाई उद्धृत गर्दै लेखेको छ । 

किम र ट्रम्पबीच सिंगापुरमा सम्पन्न ऐतिहासिक भ्रमणपछि उत्तर कोरियाको आणविक निःशस्त्रकरणका विषयमा निकै कम प्रगति भएको छ । 

तर हालैका दिनमा कूटनीतिक गतिविधिका शृंखला नै चलेका छन् । किमले जनवरीको शुरूतिर चीनको भ्रमण गरेर त्यहाँका राष्ट्रपति शी चिनफिङलाई भेटेका छन् । 

यसैबीच अर्का वरिष्ठ उत्तर कोरियाली अधिकारी परराष्ट्र राज्यमन्त्री चोए सोन–हुइ स्विडेन जाँदैछिन् । त्यहाँ उनले प्योङयाङका लागि वाशिङटनका विशेष प्रतिनिधि स्टिफन बीगनलाई भेट्ने समाचार छ । 

बीबीसीबाट