सुर्खेत – कर्णाली प्रदेश सरकारले सुर्खेतमा प्रदेशकै सबैभन्दा ठूलो चिस्यान केन्द्र बनाउने तयारी गरेको छ ।

प्रदेश सरकारका ३ वटा मन्त्री, सांसद तथा स्थानीय जनप्रतिनिधिले बिहीवार सुर्खेतको भेरीगंगा नगरपालिका–१० स्थित जनजागृति सामुदायिक वनको जग्गामा निर्माण गर्ने गरी स्थान छनौट गरेका छन् ।

जग्गा छनौटसँगै प्रदेश सरकारको वन मन्त्रालय र भूमि मन्त्रालयले सामुदायिक वनलाई जग्गा उपलब्ध गराइदिन पत्र लेख्ने तयारी गरेको छ भने सामुदायिक वनले पत्रको आधारमा भेला बोलाएर जग्गा उपलब्ध गराइदिन भनेर डिभिजन वन कार्यालय सुर्खेतलाई अनुरोध गर्ने सामुदायिक वनका अध्यक्ष हिक्मतबहादुर रानाले बताए ।

वन डिभिजन कार्यालय सुर्खेतका प्रमुख भक्तबहादुर लामाले सामुदायिक वनले चिठी लेखेको खण्डमा आफूले प्रदेश सरकारलाई पठाउने र चिस्यान केन्द्रका लागि आवश्यक जग्गा उपलब्ध गराउन पहल गर्ने जानकारी दिए । भेरीगंगा नगरपालिकाको जडिविसौने मदानेचौरको जग्गामा चिस्यान केन्द्र बनाउन लागिएको भूमि व्यवस्था, कृषि तथा सहकारी मन्त्री विमला केसीले जानकारी दिइन् ।

जग्गा प्राप्तिको पहल पनि जारी राख्ने र स्थानीय सरकारसँग सहकार्य गर्दै चिस्यान केन्द्रको डीपीआर निर्माण कार्यमा तीव्रता दिने उनले जानकारी दिइन् । मन्त्री केसीले जाजरकोट–डोल्पा सडकको छिन्चु खण्डमा चिस्यान केन्द्र बनेको खण्डमा जाजरकोट, डोल्पा, सुर्खेत, सल्यान र रकुम पश्चिमका जनताले अत्याधिक लाभ लिन पाउने जानकारी दिइन् ।