सुर्खेत- कर्णाली प्रदेशको राजधानी वीरेन्द्रनगरबाट श्रम स्वीकृति सेवा आरम्भ भएको छ । आइतबार श्रम तथा रोजगार कार्यालय सुर्खेतमा आयोजित एक कार्यक्रममा कर्णाली प्रदेशका सामाजिक विकास मन्त्री दल रावलले सेवाग्राहीलाई श्रम स्वीकृति प्रदान गर्दै उदघाटन गरेका हुन् । सेवा शुरू भएसँगै विदेश गएर फर्केकाहरूले पुनः श्रमस्वीकृति लिनका लागि काठमाडौं जाने बाध्यता समाप्त भएको छ ।

कर्णालीका दश जिल्लाका युवायुवतीले विदेश जानका लागि श्रम स्वीकृति लिन थप सहज भएको मन्त्री रावलको भनाई छ । ‘कोहलपुरमा यो कार्यालय सचालन गर्ने तयारी संघीय सरकारको थियो ।’ मन्त्री रावलले भने, ‘मेरो कडा विरोधका कारण यहाँ कार्यालय आएको हो । कर्णालीबासी जनताका लागि यो कार्यालयले राहत दिनेछ ।’ मन्त्री रावलले श्रम स्वीकृति दिने प्रक्रिया अनलाइन मै भएका कारण अब श्रमीकह? ठगिनबाट बच्ने बताए । ‘विगतमा श्रमीकहरूमाथि ठगी भइरहेको समाचार बारम्बार सार्वजनिक हुने गरेको थियो’ रावलले भने, ‘तर अब कार्यालय इ गर्वनेन्समा गइसकेपछि श्रमीकहरूलाई ठगिनबाट बचाउनेछ ।’ रावलले कर्णालीका युवाहरूलाई लक्षित गरेर श्रमनीति ल्याउन लागिएको जानकारी दिए ।

‘कर्णालीका युवाहरूलाई उत्पादन मुलक सीप सिकाउने गरी मन्त्रालयले नीति तय गरिरहेको छ’ उनले भने, ‘हामी कर्णालीका हरेक युवालाई विश्व बजारमा बिक्नसक्ने बनाउनेछौं ।' मन्त्री रावलले तत्काल श्रम स्वीकृति दिन शुरू भएका कारण कर्मचारी अभाव भएको भए मन्त्रालयले स्वंयसेवकको व्यवस्था गरेर भएपनि सेवा प्रवाहमा चुस्तता ल्याउने बताए ।

श्रम स्वीकृति पाउँदा खुशी

कार्यक्रममा मन्त्री रावलले एक जना साउदी अरबमा विगत १७ वर्षदेखि काम गरिरहेका ललित घर्तीलाई श्रम स्वीकृति हस्तान्तरण गरेका थिए । सुर्खेतमै श्रम स्वीकृति पाएका घर्ती अत्यन्तै हर्षित देखिए । ‘छोटो समयमा भनेकै बेलामा श्रम स्वीकृति पाईयो,' घर्तीले लोकान्तरलाई भने, ‘सरकार नजिकै आएको महसुस भयो ।’

घर्तीका अनुसार उनले यो भन्दा अघि श्रम स्वीकृति लिँदा काठमाडौंमा धेरै झन्झट व्यहोर्नु परेको थियो । श्रम तथा रोजगार कार्यालय प्रमुख श्याम प्रसाद आचार्यका अनुसार तत्कालका लागि उक्त कार्यालयबाट विदेश गएर आएकाहरूलाई मात्रै श्रम स्वीकृति दिने बताए । ‘हामीले विदेश गएर आइसकेकाहरूलाई मात्रै पुनः श्रम स्वीकृति दिने छौं’ आचार्यले भने, ‘नयाँ श्रम स्वीकृती काठमाडौंमा नै पाइनेछ ।’ कार्यालयबाट पुनः श्रम स्वीकृति लिदा श्रकिले रोजगार कल्याणकारी कोषका लागि ? १५ सय बैकमा जम्मा गर्नुपर्ने छ भने बीमा पनि गर्नुपर्नेछ । त्यो वाहेक स्वीकृति लिँदा अन्य कुनै थप रकम नलाग्ने आचार्यको भनाई छ ।