काठमाडौं–मलेसिया जाने कामदारहरूबाट गैरकानूनी रूपमा अतिरिक्त रकम असुलेको आरोपमा कारवाहीमा परेको ‘भिएलएन’ पुनः सक्रिय भएको छ । ‘मलेसिया भिएलएन नेपाल प्राइभेट लिमिटेड’ले गत जनवरी ११ मा बिक्की बिकको नाममा रू ७ हजार ४ सय ८० लिएर जारी गरेको ए ए ००२७९७६३ नम्बरको रसिद लोकान्तरलाई प्राप्त भएको छ । 

मलेसियाको ‘ओटा टनेल स्क्वाड’मा काम गर्नका लागि बिक्की बिक लगायत १९ जना कामदारले  भिएलएनमार्फत प्रक्रिया अघि बढाएका थिए । श्रम रोजगार तथा सामाजिक सुरक्षा मन्त्रालयले बिकलाई जनवरी १८ तारिखमा दिएको श्रम स्वीकृतिका आधारमा बिकले मलेसियाको भिसा प्राप्त गरे । बिकसहित २० जनाको समूह मलेसिया उडिसकेको छ । 

गत जेठमा श्रम मन्त्रालयले नेपालबाट कुनै स्वीकृति नलिई सञ्चालनमा रहेका बायोमेट्रिक, माइग्राम्स, आइएससी, ओएससी र भिएलएन सेवा तत्काल बन्द गर्ने निर्णय गर्दै कानूनी प्रक्रिया थाल्न निर्देशन दिएको थियो । 

त्यसलगत्तै गृह मन्त्रालयको निर्देशनमा प्रहरीले यी संस्थाहरुमा छापा मारेको थियो । प्रहरीले बायोमेट्रिक सेन्टर, आइएससी, भिएलएन र वान स्टप सेन्टरमा छापा मारी केही व्यक्तिहरुलाई पक्राउ गरी कागजात र कम्प्युटरसमेत नियन्त्रणमा लिएको थियो । 

भिएलएन खारेजीको निर्णयसहित मुद्धा दायर भएपछि यसका सञ्चालक राम श्रेष्ठ गत जेठको पहिलो साता पक्राउ परेका थिए । यही मुद्धामा १ महिनासम्म हिरासतमा राखिएको थियो । काठमाडौँ जिल्ला अदालतको आदेशमा १० लाख र ललितपुर जिल्ला अदालतको आदेशमा १२ लाख धरौटी बुझाएर श्रेष्ठ छुटेका थिए ।