काठमाडौं– नायिका प्रियंका कार्की र नायक आयुष्मान देशराज जोशीले ‘आयंका फाउन्डेसन’को औपचारिक घोषणा गरेका छन् ।

राजधानीमा  सोमबार पत्रकार सम्मेलनको आयोजना गर्दै उनिहरुले फाउण्डेसनको औपचारिक घोषणा गरेका हुन् । ‘हामी सबै संगै, एक पाइला एकै साथ, खुसी खोज्ने प्रयास’ नाराका साथ सामाजिक सेवामा काम गर्ने उद्देश्यले फाउण्डेसनको घोषणा गरिएको उनिहरुले बताएका छन् । 

आफ्नो र आयुष्मानको प्रेमको प्रतिकको रुपमा दुबै जनाको नामबाट ‘आयंका फाउण्डेसन’ स्थापना गरेको नायिका प्रियंकाले बताईन् । 

खासगरि महिला तथा बालबालिकाको हितमा रहेर काम गर्ने उद्धेश्यले फाउण्डेसन स्थापना गरिएको प्रियंकाले बताइन् । ‘फाउण्डेसन नितान्त समाज सेवाका लागि स्थापना गरिएको हो’– घोषणा कार्यक्रममा प्रियंकाले भनिन् । 

उनका अनुसार फाउण्डेसनले किशोर–किशोरीलाई ब्यक्तिगत विकासका साथै यौन शिक्षा, बालबिबाह, महिनावारी, कुलत, मनोवैज्ञानिक बिषयमा परामर्श दिने, नेपालको दुरदराजमा रहेका अनाथ, असाहय, पीडित, अपहेलित, गरिबीका कारण उच्च शिक्षाबाट बञ्चित बालबालिकालाई पढ्ने वातावरण सिर्जना गर्नका लागि आवश्यक पर्ने लत्ताकपडा, अध्ययन सामाग्रीको प्रबन्ध गर्ने लगायतका सामाजिक कार्य गर्नेछ ।

त्यस्तै नायक आयुष्मानले समाजसेवा गर्ने आफूहरुको चाहना फाण्डेसनमार्फत पुरा हुने बताए । जोसुकै ब्यक्तिले पनि फाउण्डेसनमार्फत समाज सेवामा योगदान दिन सक्ने आयुष्मानले जानकारी दिए ।

फाउण्डेसनको अध्यक्षमा प्रियंका र महासचिवमा आयुष्मान रहेका छन् । फाउण्डेशनको प्रमुख सल्लाहाकारमा कलाकार तथा निर्देशक सरोज ओली छन् । फाउण्डेसनमा ७ सदस्य कार्यसमिति रहेको छ । वैवाहिक बन्धनमा बाँधिने तयारीमा रहेका प्रियंका र आयुष्मानले कमाइको १० प्रतिशत फाउण्डेसनमा खर्च गर्ने बताए ।