काठमाडौं – महासमिति बैठकबाट पारित प्रस्तावलाई अनुमोदन गर्न र संशोधित विधान अनुसार केन्द्रदेखि गाउँसम्म नयाँ कार्यक्रम तयार गर्नका लागि नेपाली कांग्रेसले माघ १० गतेदेखि केन्द्रीय कार्यसमितिको बैठक बोलाएको छ ।

कांग्रेस प्रवक्ता विश्वप्रकाश शर्माका अनुसार माघ १० गतेदेखि बोलाइएको केन्द्रीय कार्यसमितिको बैठकले समसामयिक राजनीतिक घटनाक्रमको विश्लेषण गर्नेछ । त्यसका साथै केन्द्रदेखि स्थानीय तहसम्म नयाँ र परिमार्जित कार्यदिशा तय गर्नेछ ।

कांग्रेसको आसन्न केन्द्रीय समिति बैठकले देशमा भएका भ्रष्टाचार काण्डहरू, कर छली गर्दै कानूनविपरीत विदेशमा भइरहेको लगानी, डाक्टर गोविन्द केसीसँग सरकारले गरेको सम्झौता विपरीत आएको चिकित्सा शिक्षा विधेयक, विभिन्न स्वतन्त्र निकायमा सरकारले गरेको हस्तक्षेप लगायतका विषयमा छलफल गर्ने शर्माले बताए ।

शर्माका अनुसार बैठकले देशको परिवर्तित व्यवस्था अनुसार संघीय, समावेशी र धर्मनिरपेक्षता लगायत ५ वटा मूलभूत मान्यतामा आधारित रहेर केन्द्रदेखि स्थानीय तहसम्म आफ्ना कार्यक्रम तय गरेर सबैलाई कार्यान्वयनका लागि परिपत्र समेत गर्नेछ ।

कांग्रेस केन्द्रीय सदस्य धनराज गुरुङका अनुसार आसन्न केन्द्रीय समिति बैठकमा पार्टीको संशोधित विधान लागू गर्ने विषयमा छलफल हुनेछ । ‘केन्द्रीय कार्यसमितिले पार्टीको संशोधित विधान अनुसारका नयाँ कार्यक्रमहरू तय गर्नेछ,’ गुरुङले लोकान्तरलाई भने, ‘त्योबाहेक पार्टीको भातृ संगठन नेविसंघभित्र देखिएको समस्या र देशमा बढिरहेको भ्रष्टाचार र बेथितिबारे छलफल हुनेछ ।’

सडक र संसदमा नेपाली कांग्रेसको भूमिका कस्तो हुने भन्ने विषय र अन्य धेरै समसामयिक राजनीतिक परिस्थितिको मूल्यांकन केन्द्रीय कार्यसमिति बैठकले गर्ने गुरुङले बताए ।

‘सरकारका गैरकानूनी कामकारवाहीलाई निस्तेज पार्ने गरी सडक र सदनबाट विरोध गर्न कांग्रेसले छायाँ सरकार गठनको तयारी पनि गरिरहेको छ,’ गुरुङले भने । बैठकले छायाँ सरकारका काम, कर्तव्य र कार्यविभाजनका विषयमा पनि छलफल गरी आधिकारिक धारणा सार्वजनिक गर्नेछ ।

स्रोतका अनुसार पार्टी सभापति शेरबहादुर देउवाले केन्द्रीय कार्यसमिति बैठकमा कसरी एजेण्डा तय गर्ने भन्नेबारे आफ्नै निवासमा नेता रामचन्द्र पौडेल र अर्का नेता कृष्णप्रसाद सिटौलासँग छलफल र परामर्श गरेका छन् ।

गत मंसिर २९ गते भएको महासमिति बैठकमा पार्टीले प्रमुख प्रतिपक्षीको भूमिका राम्रोसँग खेल्न नसकेको र पार्टीभित्र गुट–उपगुटको जन्म भएको भन्दै महासमिति सदस्यले शीर्ष नेताको आलोचना गरेका थिए । पार्टीभित्र लामो समयदेखि विवादमा रहेको केन्द्रीय पदाधिकारीको संख्याबारे महासमिति बैठकमा सहमति जुटेको थियो । 

कांग्रेसमा हाल नीति तथा प्रशिक्षण प्रतिष्ठानको संयोजकका रूपमा उपसभापति विमलेन्द्र निधि आफैं रहेका छन् । आसन्न केन्द्रीय समितिले महासमितिबाट पारित विधान र अन्य ४ दस्तावेजलाई समेत अनुमोदन गर्ने प्रवक्ता शर्माले बताए ।