बुटवल – नेपाली कांग्रेसका वरिष्ठ नेता रामचन्द्र पौडेलले अहिलेको वाम सरकारले लोकतन्त्रको घाँटी निमोठ्दै अगाडि बढेको आरोप लगाएका छन् । सरकार लोकतन्त्रको भर्‍याङ चढेर अधिनायकवादको बाटोमा लम्किरहेको दाबी उनले गरे । 

प्रजातान्त्रिक विचार समाज रूपन्देहीले मंगलबार बुटवलमा आयोजना गरेको विचार गोष्ठीलाई सम्बोधन गर्दै नेता पौडेलले त्यसको पछिल्लो उदाहरण सरकारले दुई दिन अगाडि गठन गरेको संवैधानिक परिषद् रहेको बताए । 

‘सरकार अधिनायकवादतर्फ जान लागेको छ,’ नेता पौडेलले भने, ‘संवैधानिक परिषदमा विपक्षी दलको नेता अनिवार्य हुनुपर्ने भए पनि सरकारले विपक्षी दलको नेता नै नराखी आयोग गठन गर्‍यो । सरकारले संवैधानिक आयोगहरूलाई पनि कार्यकता भर्ती केन्द्र बनाउँदै लग्यो ।’ 

उनले थपे, ‘सरकारले प्रजातान्त्रिक संस्कारमाथि ठूलो प्रहार गर्दै अगाडि बढेर लोकतान्त्रिक संस्कारलाई धरासायी बनाउँदैछ । यसविरुद्ध सम्पूर्ण कांग्रेस कार्यकताहरू एकजुट हुनुको विकल्प छैन ।’

सरकारले जनताप्रति गरेको कुनै पनि वाचा पूरा गर्न नसकेको बताए । ‘अहिले वर्तमान दुई तिहाइको सरकारले जनताको आधारभूत आवश्यकताहरू शिक्षा, स्वास्थ्य, रोजगार कुनै पनि पूरा गर्न सकेन । सरकार दुई तिहाइले झनै ग्रस्त बन्यो,’ नेता पौडेलले भने । 

पौडेलले पार्टीको १४औं महाधिवेशन निर्धारित मितिमै हुनुपर्नेमा जोड दिए । ‘अब हामीले कार्यसमितिको अवधि बढाउन हुँदैन,’ उनले भने, ‘मैले पटक–पटक विभिन्न फोरममा सययमै महाधिवेशन गराउनुपर्छ भन्दै आएको छु । अब समयमा नै महाधिवेशनमा जानुपर्छ । यसो गर्न सकिएन भने दुर्भाग्य हुन्छ ।’ 

कांग्रेसका भातृ संगठनहरू सिद्धान्त अनुकूल नचल्दा पार्टी निर्वाचनमा पराजित भएको पौडेलको भनाइ छ । जनताले कांग्रेसको सिद्धान्तलाई पत्याए, तर संगठनलाई राम्रो मानेनन् । कांग्रेसको विचार निर्वाचनले जित्यो कांग्रेसले त्यही कारण निर्वाचनमा हारेको हो ।’

नेतालाई पनि निरकुंश बनाउन नहुने भन्दै उनले अहिले कांग्रेसको विधानपूर्ण लोकतान्त्रिक बनेको बताए । विधान समावेशी बनाएको र कांग्रेसको महासमिति बैठकले एउटा अनुपम लोकतान्त्रिक र अनुपम समावेशी विधान दिएको उनको भनाइ छ । कार्यक्रममा कांग्रेसका केन्द्रीय सदस्य डा. चन्द्र भण्डारीले मुलुकको परिवर्तनका लागि युवाहरू एकताबद्ध हुनुपर्ने बताए । 

नेताहरू धनी भए, देश गरीब बन्दै गयो, यसलाई परिवर्तन गर्ने खाँचो छ । त्यसका लागि युवा नेताहरू जिम्मेवार भएर लाग्न आवश्यक छ ।’ राजनीतिक दलका नेताहरूमा परिवारवाद हाबी रहेको भण्डारीको भनाइ छ । 
‘वरिपरि स–साना झुप्रा बनाउने बीचमा आफ्नो ठूलो महल ठड्याउने नेताहरू भए । त्यही भएर मुलुक कमजोर बन्दै गयो,’ भण्डारीले भने । 

कार्यक्रममा कांग्रेस केन्द्रीय सदस्य प्रदीप पौडेलले समाजको मुख्य मुद्दा भ्रष्टचार भएको भन्दै त्यसविरूद्ध लड्नुपर्ने बताए । यो विकृति अन्त्यका लागि लडनुपर्छ, यसका पछाडि पर्नु हुँदैन,’ उनले भने ।