काठमाडौं – चिनीको मूल्य घटाउने उद्देश्यले चिनी उद्योगको सह-उत्पादन (बाइ प्रडक्ट)का रूपमा उत्पादन हुने वस्तुको व्यवसायिक उपभोगका सम्बन्धमा अध्ययन गर्न सरकारले कार्यदल गठन गरेको छ ।

चिनी उद्योगको सह उत्पादनका रूपमा उत्पादन हुने बगास, मोलासिस, स्प्रिट र इथानोल लगायतका वस्तुको व्यवसायिक रूपमा उपयोग गरी चिनीको उत्पादन लागत कम गर्ने उद्देश्यले सरकारले कार्यदल गठन गरेको हो ।

चिनी उद्योगको सह-उत्पादनका रूपमा उत्पादन हुने वस्तुको अध्ययन गरी १५ दिनभित्र प्रतिवेदन पेश गर्न गत पुस २५ मा मन्त्रीस्तरबाट भएको निर्णय अनुसार उद्योग विभागका महानिर्देशक विनोद प्रकाश सिंहको संयोजकत्वमा कार्यदल गठन गरिएको हो ।

सो कार्यदलले चिनी उद्योगका सह-उत्पादक बगास, मोलासिस, इथानल आदिको उपयोग र उत्पादन गर्न सकिने अन्य सह-उत्पादनको बारेमा अध्ययन गर्नेछ ।

सह-उत्पादनको उपयोगबाट चिनी उत्पादनको लागत मूल्य घट्ने र उपभोक्तालाई राहत हुने मन्त्रालयको विश्वास छ ।

सरकारले तोकेको उखुको मुल्यका आधारमा चिनीको उत्पादन लागतका विषयमा प्रक्षेपण गरी आवश्यक सिफारिस गर्ने जिम्मेवारी सो कार्यदललाई दिइएको छ ।

त्यस्तै चिनी उद्योगीले उखु किसानलाई तिर्न बाँकी रकम यकिन गरी समयमै भुक्तानीको आवश्यक प्रबन्ध मिलाउने आवश्यक सुझाव दिन समेत कार्यदललाई भनिएको छ ।

सञ्चालनमा आउन नसकेका चिनी उद्योगहरू सञ्चालनमा ल्याउने उपाय पहिल्याउन समेत कार्यदललाई भनिएको छ ।