काठमाडौं –प्रमुख प्रतिपक्षी दल नेपाली कांग्रेसले अवरोध गर्ने चेतावनी दिएपछि मंगलवार बस्ने भएिको प्रतिनिधि सभाको तेस्रो बैठक सूचना टाँसेर स्थगित भएको छ ।

१५ मिनेटपछि बस्ने भनेर स्थगित भएको तेस्रो बैठक ‘विशेष कारणवश’ माघ ११ गते १ बजेसम्मको लागि स्थगित गरिएको संघीय संसद् सचिवालयका महासचिव मनोहर भट्टराइले जनाएका छन् । 

त्यसअघि मंगलवार दिउँसो बसेका दुईवटा बैठकमा सभामुख कृष्णबहादुर महराले राष्ट्रिय चिकित्सा शिक्षा विधेयकलाई पारित गर्ने प्रक्रियामा लगेपछि कांग्रेसले हंगामा गरेको थियो । दिउँसो बसेको दोस्रो बैठकमा सभामुख महराले शिक्षा मन्त्री गिरिराजमणि पोखरेललाई विधेयकमाथि छलफल गरिसोय् भनी प्रस्ताव पेश गर्न अनुमति दिएपछि कांग्रेस आक्रोशित भएको थियो । 

रोष्टमतर्फ जाँदै गरेका मन्त्रीलाई कांग्रेस सांसदले घेराबन्दी गरेपछि सभामुख महराले दोस्रो बैठक पनि १५ मिनेटका लागि स्थगित गरेका थिए । प्रतिपक्षलाई पेलेर विधेयक पारित गर्न खोजिए अप्रिय स्थिति आउने भन्दै कांग्रेसले चेतावनी दिएपछि संसद् बैठक सूचना टाँसेर स्थगित गरिएको हो । 

आफ्नो पार्टीका नेताका नाममा रहेका अस्पताललाई सरकारले खारेजीतर्फ लैजाने षड्यन्त्र गरेको आरोप लगाउँदै कांग्रेसले सदनमा अवरोध गरेको हो । नेताको नाममा खोलिएका अस्पताललाई केन्द्र सरकार मातहत ल्याउन दबाब दिएपनि विधेयक पारित गर्न नदिने कांग्रेसको रणनीति थियो ।