काठमाडौं – चिकित्सा शिक्षा क्षेत्रमा सुधारका विभिन्न मागसहित अनशनरत डा. गोविन्द केसीको जीवन रक्षाको माग राख्दै आजबाट रिले अनशन शुरू गरेका डाक्टरहरूविरुद्ध बिरामीका आफन्तले प्रदर्शन गरेका छन् ।

अस्पातलमा बिरामीलाई असर पर्ने गरी अनशन बस्न नहुने भन्दै सेवाग्राहीले विरोध प्रदर्शन गरेका हुन् । नियमित स्वास्थ्य परीक्षण गर्नुपर्ने चिकित्सकहरू बिरामी जाँच्न नआएपछि सेवाग्राही प्रदर्शनमा उत्रिएका छन् ।

चिकित्सकहरूको आन्दोलनका कारण सयौं बिरामी मर्कामा परेका छन् ।

डाक्टरहरू उपचारमा किन नआएको भन्दा अस्पतालका तर्फबाट जवाफ नआएपछि विरोध प्रदर्शन गर्नुपरेको शिक्षण अस्पतालमा स्वास्थ्य परीक्षणका लागि आएका सेवाग्राही ईश्वर पोखरेलले बताए ।

डाक्टरहरू अनशनमा बसिरहेको अगाडि पुगेर सेवाग्राहीले नारा लगाएका थिए । 

यता अस्पताल प्रशासनले पनि अस्पताल परिसरमा अनशन नबस्न ध्यानाकर्षण गराएको छ ।

'नेपाल चिकित्सक संघले यस अस्पताल परिसरमा रिले अनशन बस्न लागेको भनी प्रकाशित विज्ञप्तिप्रति अस्पतालको गम्भीर ध्यानाकर्षण भएको छ,' अस्पतालद्वारा सोमबार जारी अपिलमा भनिएको छ ।

अस्पतालका कार्यकारी निर्देशक प्रा.डा. प्रेमकृष्ण खडगाद्वारा जारी विज्ञप्तिमा अघि भनिएको छ, 'अस्पताल परिसरमा हुने अनशन, रिले अनशन, विरोध प्रदर्शन जस्ता कार्यहरूले सर्वसाधारण जनतालाई स्वास्थ्योपचार सुविधा प्रदान गर्न समस्या हुने भएको प्रति ध्यानाकर्षण गराउँदै शिक्षण अस्पताल जस्तो सर्वसाधारणको पहुँचमा रहेको अस्पतालमा कुनैपनि धर्ना, विरोध, बन्द हडतालको कार्यक्रम नराखिदिनुहुन र देशको ऐन एवं चिकित्सकीय नैतिक दायित्व अनुरूप सदाझैं नियमित स्वास्थ्योपचारको सेवा प्रदान गर्ने पुनित कार्यमा सहयोग गरिदिनुहुन सम्बन्धित सबैमा हार्दिक अपिल गर्दछु ।'

चिकित्सा शिक्षा विधेयकमा आफूसँग भएका सहमति विपरीतका कतिपय विषय समेटिएको भन्दै डा. केसीले गत पुस २५ गतेबाट अनशन शुरू गरेका हुन् ।

डा. केसीको अनशन जारी रहेकै अवस्थामा विधेयक प्रतिनिधिसभाबाट पारित भएर राष्ट्रियसभामा पुगिसकेको छ । राष्ट्रियसभाले समेत उक्त विधेयक स्वीकृत गरिसकेको छ ।

राष्ट्रिय सभाबाट पारित भएर राष्ट्रपतिले प्रमाणीकरण गरेपछि विधेयकले ऐनको रूप लिनेछ ।

भिडियो :

हेर्नुहोस्, तस्वीरहरू :