आफूलाई जन्माएकोमा बुवाआमाविरुद्ध मुद्दा हाल्दै यी व्यक्ति

माघ २५, २०७५

काठमाडौं — एक भारतीय पुरुषले आफ्नो सहमतिबेगर आफूलाई जन्माएकोमा मातापिताविरुद्ध मुद्दा हाल्ने योजना बनाएका छन् । 

मुम्बईमा बस्ने व्यापारी रफाएल स्यामुएलले बीबीसीलाई बताएअनुसार, शिशुलाई यस संसारमा ल्याउनु गलत भएको किनकि जन्मेपछि जिन्दगीभरि समस्या भोग्नुपर्छ । 


ADVERTISEMENT

तर हामी जन्मनुअघि हाम्रो सहमति खोज्न सम्भव नरहेको स्यामुएललाई थाहा छ तर जन्मने आफूहरूको निर्णय नभएकोमा उनी अडिएका छन् । 

आफूहरूले जन्माउनु नभने पनि जन्मिएपछि बाँच्नका लागि जिन्दगीभरि मूल्य चुकाउनुपरेको उनको तर्क छ । 

स्यामुएलको यो धारणालाई एन्टी नेटलिजम भनिन्छ । यो दर्शनअनुसार, जीवनमा धेरै दुःखपीडा हुनाले मानिसहरूले बच्चा जन्माउने काम तत्कालै रोक्नुपर्छ । 

यसो गर्दा पृथ्वीबाट मानवजाति क्रमशः हराउँदै जाने र यसले गर्दा ग्रहलाई झन् राम्रो हुने उनले बताए । 

‘मानवजातिको कुनै अर्थ छैन । धेरै मानिसले दुःख पाइरहेका छन् । मानवजाति लोप भएमा पृथ्वी र जनावरहरू झन् खुशी हुन्छन् । अनि कुनै मानवले पनि दुःख पाउनु पर्दैन । मानवको अस्तित्व पूरै अर्थहीन छ ।’

एक वर्षअघि उनले फेसबूक पेज निहिलानन्द बनाएका थिए । त्यसमा उनले ठूलो नक्कली दाह्री, आँखाको मास्क र एन्टी नेटलिस्ट सन्देशहरू सहितको तस्वीर राख्ने गरेका छन् । एउटा सन्देश यस्तो छ, ‘तपाईंका आमाबुवाले खेलौना वा कुकुरको साटो तपाईंलाई ल्याए । तपाईं उनीहरूप्रति ऋणी हुनुहुन्न, तपाईं उनीहरूका लागि मनोरञ्जन मात्र हुनुहुन्छ ।’

यससम्बन्धी विचार उनको मस्तिष्कमा बढ्दै गएपछि उनले आफ्ना मातापितालाई यसबारे बताउने निर्णय गरे । 

स्यामुएलले आफ्ना मातापितासँग प्रेमिल सम्बन्ध रहेको बताए । दुवैजना वकिल हुन् । आमाले यो विचारप्रति सकारात्मक प्रतिक्रिया दिएको र बुवा पनि यसप्रति क्रमशः सकारात्मक हुँदै गएको उनले बताए । 

यो संसार मानवजाति नहुँदा झन् राम्रो हुन्छ भन्ने आफ्नो विश्वासका कारण मात्र मातापिताविरुद्ध अदालतमा मुद्दा हाल्ने निर्णय लिएको उनी बताउँछन् । 

त्यसैले ६ महिनाअघि उनले बिहानको खाना खाँदै गर्दा आमालाई तपाईंविरुद्ध मुद्दा हाल्छु भने । ‘उहाँले ल ठीक छ, तर म अदालतमा नरम हुन्छु भन्ने अपेक्षा नराख भन्नुभयो । म अदालतमा तिमीलाई ध्वस्त पार्छु भन्नुभयो ।’
स्यामुएलले आफ्नो मुद्दा लिने वकिल खोजिरहेका छन् तर अहिलेसम्म सफलता  हात पारेका छैनन् ।

उनको फेसबूक पोस्टले धेरै प्रतिक्रिया निम्त्याएको छ । तीमध्ये केही सकारात्मक र धेरै नकारात्मक छन् । कसैले त उनलाई ‘जा, गएर मर्’ समेत भने । 

उनका आलोचकहरूले यो सब प्रचारका लागि गरिएको भन्ने गरेका छन् । 

‘मैले प्रचारका लागि यसो गरेको हैन,’ उनी भन्छन्, ‘तर म यो विचारलाई सार्वजनिक गर्न चाहन्छु । मेरो विचार सरल छ, बच्चा नजन्माएकै ठीक हो ।’

जन्मिनुपर्दा दुःखी हुनुहुन्छ भन्ने प्रश्नमा उनले भने, ‘म नजन्मिएको भए हुन्थ्यो । तर म जीवनदेखि दुःखी छैन । मेरो जिन्दगी गजबको छ तर म यहाँ रहन चाहन्नँ । यो कस्तो कुरा हो भने एउटा राम्रो कोठा छ तर म त्यो कोठामा बस्न चाहन्नँ,’ उनी व्याख्या गर्छन् । 

बीबीसीबाट

माघ २५, २०७५ मा प्रकाशित

प्रतिक्रिया दिनुहोस