बुटवल – ५ नम्बर प्रदेशको स्थायी राजधानी र नामाकरणका लागि गठित विशेष समितिमा सदस्य हेरफेर गरिएको छ ।

समितिमा सबै जिल्लाका सदस्यको प्रतिनिधित्व नभएको भन्दै पटक–पटक संसदका कुरा उठ्दै आएको थियो । समितिमा पश्चिम नवलपरासी, रूकुम र बाँकेबाट प्रतिनिधित्व थिएन । 

समितिका ३ जना सदस्य हटाएर ३ नयाँ सदस्यहरू थप गरिएका हुन् । रूपन्देहीका अष्टभुजा पाठकलाई हटाएर नवलपरासी पश्चिमका बैजनाथ कलवारलाई थप गरिएको छ । अर्घाखाँचीका चेतनारायण आचार्यलाई हटाएर बाँकेका बाबुराम गौतम र बर्दियाका दिपेश थारूलाई हटाएर रूकुम पूर्वका तेजबहादुर ओलीलाई सदस्यमा थप गरिएको हो । 

प्रदेश सभाको मंगलवार बसेको बैठकमा सभामुख पूर्णबहादुर घर्तीले ३ जनाको नाम हटाएर नयाँ ३ नयाँ समितिमा थप गरिएको सभालाई जानकारी दिए । १५ सदस्यीय समितिमा कल्पना पाण्डे (अर्घाखाँची), तारा जिसी (प्यूठान), तुलसीप्रसाद चौधरी (रूपन्देही), दीनेश पन्थी (गुल्मी), दिपेन्द्र पुन मगर (रोल्पा), नारायणप्रसाद आचार्य (पाल्पा), निर्मला क्षेत्री (अर्घाखाँची), भुवनेश्वर चौधरी (बर्दिया), रमा अर्याल (रूपन्देही), वीरबहादुर राना (पाल्पा), विष्णुप्रसाद पन्थी (कपिलवस्तु), सरस्वती गौतम (दाङ) र सहसराम यादव (कपिलवस्तु) रहेका छन् । 

प्रदेशसभाको दोस्रो अधिवेशनको अन्तिम बैठक साउन २९ गते अन्तिम बैठकले प्रदेशको नामाकरण र राजधानी कहाँ बनाउने भनेर सुझाव संकलनका लागि विशेष समिति बनेको थियो । ३ महिनाभित्र सुझाव संकलन गर्ने गरी गठित समितिले संयोजक समेत तोक्न सकेको थिएन ।

समितिको म्याद सकिएपछि समितिको संयोजकमा दीपेन्द्र पुन मगर चयन गरेको थियो । तर फेरि सबै जिल्लाबाट प्रतिनिधित्व हुन नसकेको सांसद र विभिन्न समितिका बैठकमा कुरा उठेपछि फेरि सबै जिल्लाबाट प्रतिनिधित्व हुने गरी सदस्य थप गरिएका छन् ।

समितिका संयोजक दीपेन्द्र पुन मगरले समिति गठन गर्दा सबै जिल्लाबाट प्रतिनिधित्व नहुँदा अहिले आएर हेरफेर गर्नुपर्ने अवस्था आएको बताए । उनले भने, ‘समितिमा सदस्य थपघट भएको कुरा हजुरबाट सुन्न पाए । अब समितिमा सबै जिल्लाको प्रतिनिधित्व भएको छ । अबको १ हप्तापछि हामी रायसुझाव संकलनका लागि निस्किन्छौं ।’ प्रदेशमा १२ जिल्लाका ८७ सांसदको प्रतिनिधित्व छ । 

समितिले सुझाव संकलनका लागि ६ टीम बनाएको छ । जसमा कम्तीमा २ सदस्य नघट्ने गरी एउटा समिति २ जिल्लामा पुग्ने छन् । त्यहाँ प्रश्नावलीका आधारमा स्थानीय जनता, राजनीतिक दलका नेताकार्यकता, संघसंस्थाका प्रतिनिधि र बुद्धिजीवीसँग राय सुझाव लिनेछन् ।

सांसद भूमिश्वर ढकालले राजधानीका विषयमा विवाद भएका अन्य देशमा गएर पनि ‘रिफ्रसमेन्ट’ लिने कि भन्नेबारे पनि कुरा बाहिर आएको बताए ।