सुर्खेत– लामो रस्साकस्सीका बीच कर्णाली प्रदेशमा नेपाल कम्युनिस्ट पार्टीको संसदीय दलको नेतामा पुस २ गते राति नेकपा कर्णाली प्रदेशका सहइन्चार्ज यामलाल कंडेलको प्रस्तावमा मुख्यमन्त्री महेन्द्रबहादुर शाही संसदीय दलको नेतामा सर्वसम्मत चयन भए । उनी संसदीय दलको नेता भएको दुई महिना पुग्न लाग्यो । तर यस अवधिमा उनले न त आफ्नो अधिकार प्रयोग गरेर प्रमुख सचेतक र सचेतक नियुक्त गर्न सकेका छन् । न त संसदीय समितिको बैठक नै बसाल्न नै सकेका छन् ।

उनले यो अवधि सार्वजनिक कार्यक्रममा भाषण गर्न र काठमाडौं आउजाउ गर्नमै खर्चेका छन् । नेकपाका प्रदेशसभा सदस्य दानसिंह परियारले मुख्यमन्त्री शाहीले आफूले पाएको अधिकार प्रयोग गर्न नसकेको आरोप लगाए । ‘संसदहरु कहाँ छन्, के गर्दैछन् । संसदहरुको सरकारप्रतिको धारणा कस्तो बन्दैछ । त्यसको बारेमा जान्न मुख्यमन्त्रीले संसदीय दलको बैठक बोलाउनु पथ्र्यो ।’ उनले भने, ‘सरकार गठन भएको एक वर्ष फागुन तीनमा पुग्दैछ । यो अवधिमा सरकारले कति काम गरेको छ, आफ्नो दलको वैठक बोलाएर सांसदहरुलाई जानकारी दिनुपथ्र्यो तर उहाँले किन हो त्यस्तो गर्न चाहनु भएको छैन ।’

नाम उल्लेख नगर्ने सर्तमा अर्का प्रदेशसभा सदस्यले पनि मुख्यमन्त्रीले प्रमुख सचेतक र सचेतक नियुक्तिमा ढिलाई गरेको बताए । ‘मुख्यमन्त्री शाहीले पहिले संसदीय दलको नेता भए के–के न गर्छु जस्तो गरेका थिए ।’ उनले भने, तर संसदीय दलको नेता चयन भइसकेपछि उनी कहाँ छन्, प्रमुख सचेतक र सचेतक किन नियुक्त गर्न सकेनन् थाहा भएन ।’ उनले सरकारलाई गतिशील बनाउन र प्रभावकारी बनाउन संसदीय दलको बैठक अपरिहार्य रहेको बताए ।

प्रमुख सचेतकमा पूर्वएमालेका सचेतक गुलावजंग शाह तथा सचेतकमा पूर्वमाओवादी केन्द्रकी सचेतक सीता नेपालीले दाबी गरिरहेको स्रोतको भनाई छ ।