काठमाडौं — अमेरिकाको टेक्सास राज्यमा रहेको ह्युस्टनमा सुनसान घरमा गाँजा तान्न छिरेका एक व्यक्तिले बाघ फेला पारेका छन् । 

उक्त व्यक्तिले बाघको बारेमा प्रहरीसमक्ष रिपोर्ट गर्दा पहिला त प्रहरीले गाँजको सुरमा जे पायो त्यही बोलिरहेको ठाने । 

तर उनीहरू सुनसान घरमा आइपुग्दा एक विशाल बाघ गराजभित्रको साँघुरो खोरमा थुनिएको अवस्थामा भेटे । 

नजिकै मासुका केही प्याकेजहरू राखिएका थिए । त्यसबाहेक घरमा कोही बसेको कुनै लक्षण देखिएको थिएन । 

बाघ कसरी त्यहाँ आइपुग्यो भनी अनुसन्धान गरिने अधिकारीहरूले स्थानीय सञ्चारमाध्यमलाई बताए । 

उनीहरूका अनुसार, सुनसान घरमा बाघ पहिलोपटक देख्ने मानिस त्यहाँ बस्दैनथिए र उनी त्यहाँ गाँजा तान्न गएका थिए । 

खोर सामान्य खालको भएको र त्यसलाई स्क्रुड्राइभर र नाइलनको डोरीले सुरक्षित राखिएको प्रहरीको भनाइ छ । 

त्यस्तो अवस्थामा रहेको भए पनि बाघ शान्त नै थियो तर जनावर उद्धारकहरूले उसलाई घरबाट सुरक्षित निकाल्नका लागि बेहोश बनाउने सुई हाने । 

बाघलाई टेक्सासमै रहेको आरक्षमा सारिएको छ र उक्त आरक्षको ठेगाना सार्वजनिक गरिएको छैन । 

अहिले संसारभरिको जंगलमा चारहजारभन्दा कम बाघ बाँकी रहेको वर्ल्ढ वाइल्डलाइफ फन्डको आँकलन छ । 

बीबीसीबाट