काठमाडौं — अमेरिकी सांसदहरूले राष्ट्रपति डोनल्ड ट्रम्प र साउदी अरबसँग उनको साझेदारीलाई झड्का दिँदै यमनमा खाडी देशको युद्ध प्रयासमा अमेरिकी संलग्नता अन्त्य गर्ने पक्षमा मतदान गरेका छन् । 

अमेरिकी सदनले बुधवार १७७ मतविरुद्ध २४८ मतका साथ ऐतिहासिक विधेयक पारित गरे । अब राष्ट्रपतिले ३० दिनभित्र यमनबाट अमेरिकी सशस्त्र बलहरूलाई हटाउनुपर्नेछ । 

यमनमा चार वर्षदेखि चलिरहेको युद्धका कारण हजारौं नागरिक मारिसकिएका छन् । विधेयकको पक्षमा १८ रिपब्लिकन सांसदहरूले पनि विपक्षी डेमोक्रेटहरूलाई साथ दिए । 

मतदानपछि सिनेटमाथि यस विषयमा कदम चाल्ने दबाब परेको छ । सिनेटले पनि अघिल्लो वर्ष यस्तै विधेयक पारित गरेको थियो । तर त्यतिखेर रिपब्लिकनको नियन्त्रण भएको सदनमा मतदान नै गराइएन र विधेयक निष्प्रभावी भयो । 

तल्लो सदनमा अहिले डेमोक्रेटहरूको नियन्त्रण छ । वर्षौंदेखि अमेरिकी हस्तक्षेपको विरोध गरिरहेका डेमोक्रेट सांसद रो खन्नाले ट्विटरमा भने, ‘सदनमा मेरो प्रस्ताव पारित भएपछि यमनको मानवीय संकटमा अमेरिकाको संलग्नता अन्त्य गर्नै लागेका छौं ।’

रिपब्लिकन सांसदहरूले सिरिया र अफगानिस्तानबाट सैनिक फिर्ता बोलाउने योजना लगायत अन्य परराष्ट्रनीतिमा पनि ट्रम्पप्रति असन्तोष जनाए । 

एजेन्सी