काठमाडौं — दक्षिणपूर्वी इरानमा रेभोल्युसनरी गार्ड्सको बसमा आत्मघाती कार आक्रमण गरिँदा २७ सैनिकको मृत्यु भएको छ । 

हालैका वर्षमा उच्च सशस्त्र बलमाथिको यो सबभन्दा खतरनाक आक्रमण हो । गार्ड्सले एक बयान जारी गरेर बुधवार सैनिकहरूले सीमामा गश्ती अभियानबाट फर्किने क्रममा यो आक्रमण गरिएको जानकारी दियो । 

बयानमा भनिएको छ, ‘यो आतंकवादी आक्रमणमा इस्लामका २७ बहादुर योद्धाहरूको मृत्यु भयो र १३ अन्य मानिस घाइते भए ।’ 

बयानमा यहुदी जासूसी संस्थाहरूमाथि आक्रमणकारीलाई समर्थन गरेको आरोप लगाइएको छ । यसअघि आधिकारिक आईआरएनए समाचार संस्थाले भन्यो, ‘इस्लामिक रेभोल्युसनरी गार्ड्स कोरमाथि आत्मघाती आक्रमण खाश–जाहेदन रोडमा भएको हो ।’

गार्ड्सले भन्यो, ‘बसपछाडि विस्फोटकहरू भरिएको कार पड्किएको थियो ।’

इरान अहिले १४ वर्षसम्म निर्वासित जीवन बिताएर सन् १९७९ मा आयातुल्लाह रुहल्लाह खमेनी तेहरान फर्किएको र पश्चिम समर्थक शाहलाई हटाएको ४०औं वर्षगाँठ मनाइरहेको छ । उनको आगमनपछि इस्लामिक क्रान्तिको शुरूआत भएको हो र इस्लामिक गणतन्त्रको उदय भयो । 

रेभोल्युसनरी गार्ड्समाथि आक्रमण दक्षिणपूर्वी सिस्तान बलुचिस्तान प्रान्तमा भएको हो । त्यहाँ ठूलो संख्यामा जातीय बलूची समुदायका सुन्नी मुसलमान बस्छन् । यस प्रान्तको सीमा पाकिस्तानसँग जोडिन्छ । 

जैश अल अद्ल नामक समूहले आक्रमणको जिम्मेवारी लिएको छ । यो संगठन सुन्नी अतिवादी समूह जुन्दल्लाहको उत्तराधिकारीका रूपमा सन् २०१२ मा बनेको हो ।

एजेन्सी