बुटवल – प्रदेश स्थापना दिवसरका अवसरमा मुख्यमन्त्री शंकर पोखरेलले बुटवलमा राजमार्ग सरसफाई कार्यक्रमको शुभारम्भ गरेका छन् ।

सरसफाई अभियानको शुभारम्भ गर्दै उनले राजमार्गलाई सफा बनाउने अभियान सरकारी कामकाजलाई असर नपर्ने गरी निरन्तर चलिरहने बताए ।

उनले राजमार्गबाट शुरू भएको सरसफाई अभियानलाई प्रदेशभर चलाउने बताए । बुटवलको पाखापानी मनकामना चोकदेखि तिनाउपुलसम्मको सडक क्षेत्र सफाई कार्यक्रममा बुटवल उपमहानगरपालिकाका मेयर शिवराज सुवेदी, उपमेयर गुमादेवी आचार्यसहित जनप्रतिनिधि, प्रदेश सरकारका प्रमुख सचिव, सचिव सहितका कर्मचारी, नेपाल प्रहरी, सेना र सशस्त्र प्रहरी बलका उच्च अधिकारीसहित स्थानीय वासिन्दाको समेत सहभागिता थियो । बिहान ७ बजे शुरू भएको सरसफाई अभियान ९ बजे सकिएको थियो ।

आन्तरिक मामिला तथा कानूनमन्त्री कुलप्रसाद केसीले कोहलपुर, उद्योग, वन, वातावरण तथा पर्यटनमन्त्रीले बर्दियाको भुरीगाउँ, भौतिक पूर्वाधार विकास मन्त्री बैजनाथ चौधरीले कपिलवस्तुको चन्दौटा, सामाजिक विकास मन्त्री सुदर्शन बरालले दाङको लमही र भूमि व्यवस्था, कषि तथा सहकारीमन्त्री आरती पौडेलले नवलपरासीको बर्दघाटबाट राजमार्ग सरसफाई अभियानको शुभारम्भ गरेका छन् ।

राजमार्गलाई सफा बनाउँदै सडकको दायाँबायाँ आर्कषक लहरेदार फूलहरू रोप्ने योजना प्रदेश सरकारले बनाएको छ ।