काठमाडौं – प्रधानमन्त्री केपी शर्मा ओलीले पैसालाई चलायमान नराख्ने हो भने खिइँदै जाने बताएका छन् ।

हरेक नेपालीलाई जलविद्युत्को शेयर धनी बनाउने उद्देश्यले ऊर्जा मन्त्रालयले ल्याएको ‘जनताको जलविद्युत् आयोजना’ कार्यक्रम घोषणा गर्दै प्रधानमन्त्री ओलीले पैसालाई निष्क्रिय नराख्न आग्रह गरेका हुन् ।

त्यसका लागि उनले सुनको प्रसंग जोडे । ‘पैसाको जात यस्तो हो, चल्यो भने चल्ला काढ्छ, यत्तिकै राखे खिइँदै जान्छ । ९० रुपैयाँ तोलामा मैले सुन किनेको थिएँ । अहिले ६० हजार पुग्या छ । त्यतिबेला ९० रुपैयाँमा सुन किनेको भए काम लाग्थ्यो । अहिले ९० रुपैयाँमा सुन पाइन्छ र ? छुन मात्र पाइन्छ होला ! पैसाको मूल्य घट्दो रहेछ । पैसा त चलायो भने बढ्छ,’ प्रधानमन्त्री ओलीले भने ।