काठमाडौं — फिलिपिन्सकी पत्रकार मारिया रेस्सालाई बिहीवार धरौटीमा रिहा गरिएको छ । राष्ट्रपति रोड्रिगो डुटेर्टेको आलोचना गर्ने न्युज वेबसाइट –यापलरमा आबद्ध भएकै कारण उनलाई तारो बनाइएको भनी अन्तर्राष्ट्रिय रूपमा निन्दा भएपछि उनलाई रिहा गरिएको हो । 

पचपन्न वर्षीया रेस्सालाई मनिलास्थित उनको कार्यालयबाट बुधवार पक्राउ गरिएपछि एक रात हिरासतमा बिताएकी थिइन् । सरकारले उनी र उनको वेबसाइट –यापलरमाथि दबाब बढाउनका लागि उनलाई पक्राउ गरिएको हो । 

वेबसाइट र रेस्सालाई करछलीको अभियोग लगाइएको छ । लागूऔषध प्रयोगकर्ता र कारोबारीविरुद्धको अभियानका क्रममा हजारौं मानिस मारिएपछि डुटेर्टेसँग रेस्साको सार्वजनिक संघर्ष हुने गरेको थियो । 

‘सरकारले पठाएको सन्देश एकदमै स्पष्ट छ ... कि त चुप लाग कि त तारो बन,’ भावुक भएकी रेस्साले मनिला अदालतबाहिर पत्रकारहरूलाई बताइन् । 

गत डिसेम्बरदेखि उनले छैठौंपटक एक लाख पेसोको धरौटी तिरेर हिरासतबाट रिहा भएकी हुन् । 

‘म तपाईंलाई तारो बन्नुभएको भए पनि मौन नरहन अपील गर्छु,’ रेस्साले भनिन् । उनलाई टाइम पत्रिकाले सन् २०१८ को पर्सन अफ दी ईयर घोषित गरेको थियो । 

सादा पोशाकमा आएका एजेन्टहरू –यापलर कार्यालयमा आएर पक्राउपुर्जी थमाएदेखि नै गण्यमान्य व्यक्ति, प्रेस स्वतन्त्रता र मानवअधिकार समूहका तर्फबाट अन्तर्राष्ट्रिय निन्दा आएको हो ।

एएफपीबाट